MAS hugot nga seguridad ang ipatuman sa Police Regional Office (PRO)-Central Visayas karong Sinulog human sa nahitabong pagpamomba sa dakbayan sa Cotabato.
Sugod Enero 9, atol sa Walk with Jesus, isaka na sa PRO-Central Visayas ang ilang alert status ngadto sa full alert diin tanang pulis gimandoan nga on standby sa ilang mga istasyon ug wala na’y tugotan nga maka-leave sa ilang trabaho.
Kini nagpasabot nga dililang ang kapulisan sa lalawigan sa Sugbo ang magbantay lakip na ang mga silingang probinsya sama sa Bohol, Siquijor, Negros Oriental.
Gihulagway ni Chief Superintendent Debold Sinas nga andam na sila sa paghatag sa siguridad gikan sa fluvial procession hangtod na sa adlaw sa Sinulog Grand Parade nga dugokon sa mga bisita.
Tungod sa nahitabong pagpamomba sa Cotabato niadtong bisperas sa Bag-ong Tuig, diin duha ang namatay ug daghan ang nanga-angol, hugot karon ang monitoring sa PRO-Central Visayas inabagan sa tanang intelligence unit sa gobyerno.
Giklaro hinuon nga sa pagkakaron wala pa sila’y nadawat nga hulga sa seguridad apan bisan pa man niini wala sila mo kompyansa.
Sama sa unang nasabutan sa gihimong joint security conference girekomendar sa PRO-Central Visayas ngadto sa National Telecommunication Commission sa maong rehiyon nga pawngon ang tanang signal sa cellphone atol sa Fluvial Procession hangtod na sa Sinulog Grand Parade.
Apan giklaro ni Sinas nga kadto lamang rota sa parade ug sa procession ang angayan nga pagngon ug sulod lang sa duha ka adlaw.
Gipasalig sa kapulisan nga aduna silay igong kagamitan sa ilang komunikasyon aron ma momonitor ang lihok sa mga tawo sama sa mga hand held radio.
Liboan na usab ka mga pulis ug force multipliers ang ipakatap sa kadalanan atol sa Sinulog Grand Parade gawas sa mga naka sibilyang pulis. (AYB)