ANG nasinati nga mga pag-uwan niadtong Huwebes, Enero 3 mulungtad pa hangtod karong Sabado sa kaadlawon, Enero 5.
Hinuon gipasabot sa Philippine Atmospheric, Geophysical and Astronomical Services Administration (Pagasa) nga dala lang kini sa northeast monsoon o hanging amihan.
Sugod Huwebes sa gabii ug kaganihang kaadlawon, Enero 4, kasagaran sa Kabisay-an ang nakasinati sa mga hinay ngadto sa kasarangan ug usahay kusog nga pag-uwan.
Gipasabot ni Jhomer Eclarino, weather specialist sa Pagasa Mactan, nga anaa usab ang local convictive activity, hinungdan nga masinati usahay ang pagkusog nga pag-uwan.
Karong hapon mas gipakusgan pa ang pag-uwan sa Metro Cebu, ug sa probinsya sa Sugbo ug Bohol, tungod sa presensya sa Tail End of the Cold Front nga anaa sa East sa nasud sa Japan apan nakaapektar sa kabisay-an kini base na sa gipagawas nga weather advisory ala 1, Biyernes sa hapon, Enero 4.
Pasidaan ni Eclarino sa publiko nga ang nasinati nga pag-uwan posible gihapon nga makamugna og mga pagbaha ug pagdahili sa yuta,ilabi na sa Northern Cebu, hinungdan nga ala 1:50 sa hapon, nipagawas na og yellow warning ang Pagasa alang sa maong mga lugar.
Tungod sa naglain nga napanhon, baluron ang ubang parte sa kadagatan ilabi na sa eastern ug northern portion sa Eastern Visayas ug Southern Luzon.
Hinuon mahimo ra makalawig ang mga dagkong sakyanang pandagat sa ubang parte sa kadagatan sa Kabisay-an.
Samtang ang temperatura sa Kabisay-an karong adlawa, anaa sa 25 degrees Celsius ngadto na sa 30 degrees Celsius, aduna kini heat index nga 35 to 36 degrees Celsius.
Gipahibaw ni Eclarino nga masinati na ang maayo nga panahonsugod Sabado hangtud na sa Miyerkules, Enero 10, base sa ilang 5-day weather forecast.