DUHA ka mga tawo ang gikatahong namatay human mibangga ang motorsiklo ngadto sa bus, didto sa Sitio Highlander, Barangay Haguimitan, lungsod sa Monkayo, Compostela Valley province.

Giila ang mga biktima namatay nga mao sila si Joel Aroma, hamtung ang panuigon, ug molupyo sa Sityo Patin-ay, Barangay Rizal sa susamang lungsod; ug si Noel Zarguiza, hamtung ang panuigon, ug molupyo sa Purok 14, Barangay Poblacion, lungsod sa Nabunturan.

Sumala sa report gikan sa Comval Province Police Provincial Office nga nahitabo ang aksidente pasado alas 4:00 sa hapon niadtong Martes.

Sakay sa usa ka single nga motor ang mga biktima ug gisubay nila ang national highway.

Tungod sa kakusog sa dagan sa motor nga gisakyan sa mga biktima milapas sila sa pikas lane sa dihang mikurbada sa kalsada.

Naatol sab nga nakasugat nila ang usa ka pampasaherong bus nga nagdagan padulong sa siyudad sa Butuan gikan sa dakbayan sa Davao hinungdan nga miabangga sila.

Tungod sa kusog sa impak nangalagpot ang mga biktima resulta sa kamatayon ni Aroma.

Si Zarguisa nadala pa sa ospital apan gideklarang dead on arrival sa mga doktor.

Ang drayber sa bus ang gikustodiya na karon sa kapulisan samtang ang kasong reckless imprudence resulting to double homicide ang gihikay sa kapulisan batok niini.

Ang kapulisan sa lungsod sa Monkayo ang mihimo na og dugang imbitigasyon sa hitabo. (Marvin Pineda)