HAPPIER New Year, mga kapatid, kapuso ug kapamilya!!! Tungod nasumpayan ang atong pagpuyo ning kalibutan- daygon ta ang Kahitas-an- hallelujah!!!!
Ang "Auf wiedersehen", pinulongan kini sa Germany nga nagpasabot og "goodbye." Au revoir sa France, sa Korea, Sayonara sa Japan ug "goodbye" gihapon sa Cebuano kay walay katumbas nga binisaya ning pulonga.
Naturalmente, daghan man kitang gustong kuptan ug balikbalikan sa tuig 2018- humana kini as in "FINISH" na mao, move on na kita sa mga kasakit ug kalipay nga dinala sa 2018.
Aduna ba moy pinasahe nga naobserbahan nga mga kalainan sa selebrasyon sa Pasko ug pagsugat sa New Year, igsuon? Hala, hisgutan nato pina-live karon.
Ambot sa iyong dapit apan dinhi sa Panabo, mora'g daghan ang praktikal ug "pugong" sa paggasto. Tuod, daghang pagkaon nga lamian apan mas wala kaayoy mga kasikas sa palibot, kahigalaan. Gani, kadtong New Year, alas siyete pa lang sa gabii, mingaw na god ang bag-o ug daang palengke. Mopalit pa unta mi'g gift ni Madam Alma T.
Sa pagsugat sa Bag-ong Tuig sa among purok, usa ra gayud ka bonggang "fireworks" display ang among nasaksihan. Nag-andam pa unta ko'g bidyo kay nindot nga i-post sa Facebook pero napalaw ko.
Sabagay, nindot tuod nga daghang mga artipisyal nga bituon nga magkambyo-kambyo og kolor sa kalangitan, igsuon, apan mas maayo nga dili magpasulabi'g gasto aron dili maglisod sa budget sa 2019, bro.
Bitaw, ang mga pedicab drayber nga akong higala- "mingaw" kuno ang kita. Ang akong kasilinganan- nagtampu-tampo'g mga sud-an kay among gisalohan sa plaza dala padula, paturutot ug exchange gift.
Simple ra ang kasaulogan dinhi sa among dapit apan malinawon ug grasya ni Lord, walay nadisgrasya o nagmaoy. Naay nadismaya sa regalo kay "lugi" kuno apan wala namo gihilakan kay katuyoan namo nga "happy lang." Bintahuso pod ning uban bisan sa exchange gift, no?
Simple apan mapasalamatong kasingkasing ngadto sa Makagagahum kontento na sa unsay grasya sa lamesa'g kinabuhi, igsulamesa. Yawe kini sa kinabuhing malinawon dala ang pag-ampo nga kita magmalahutayon. #happiernewyear!!!