GISULONG sa mga miyembro sa lawless Moro Islamic Liberation Front (MILF) ang posisyon sa militar sa probinsiya sa Maguindanao.
Sigun sa taho gikan sa Tactical Command Post sa 6th Infantry Division sa Philippine Army, banda alas 7:40 sa gabii, Pebrero 10, gihasi sa gibana-bana nga 50 ka mga sakop sa LMG ang detachment sa 46th Infantry Battalion sa Philippine Army.
Ang kampo sa militar, duol lamang sa bodega nga gipanag-iyahan sa mga Ampatuan sa utlanan sa Shariff Aguak ug Mamasapano.
Hinuon, dali nga nasiplatan sa mga sundalo ang maong pagpanghasi nga miresulta sa 30 minutos nga pinusilay tali sa duha ka grupo gamit ang mga tag-as nga matang sa armas.
Miatras ang mga rebelde human nga nahiabot ang dugang puwersa sa militar.
Gisulti ni 6th ID Chief Colonel Benjamin Hao nga walay nasamdan sa mga sundalo samtang dili matino kung may napatay o nasamdan sa bahin sa LMG gumikan sa nagpasad nga dugo sa ilang gi-puwestuhan.
Gidugang ni Maguindanao Police Provincial Director Senior Superintendent Alex Linesses nga kauban sa grupo nga misulong sa bodega ang ubang mga sakop sa Special Cafgu ug Civilian Volunteer Organization.
Giingong tumong nila mao ang pagkuha sa mga armas ug bala nga gitagoan sa bodega apan gumikan sa gipahugot nga seguridad sa militar ug kapulisan, nabantayan ang mga rebelde sa ilang plano.
Gimugna na sab ni Acting Maguindanao Governor Bai Nareeman Ambolodto ang Integrated Municipal Action Plan sa matag munisipyo sa probinsiya aron mapugngan ang dautang plano sa mga armadong grupo. (Edagrdo Fuerzas)