NAHIMONG leksyon alang ni Jeaneth, 21-anyos, taga SIR Matina, Davao City, human sa iyang gusto nga mahimong sakop sa Alagad Gang sa Bankerohan.
Kini human nga Huwebes sa gabii, Enero 3, isip iyang intrada aron mamahimong sakop sa maong gang, gisugo kini nga mangawat og ilimnon sulod sa usa ka convenience store sa Bankerohan, apan gidimalas kay nadakpan human gibiyaan sa iyang mga kauban.
Sumala ni Jeaneth nga nakaila niya ang usa ka sakop sa gang pinaagi sa chat sa Facebook, diin gina-agni siya nga moapil sa ilang grupo.
Apan una siya dawaton mag-inom usa sila ug giuban siya sa convenience store aron mopalit og mainom, apan ang nahitabo gipatago sa iyang mga kauban ang bino sa iyang hawak ug giingnan nga mogawas sa tindahan ug dili mobayad.
Ang nakadimalas lang kay nakit-an sila sa sekyu ug sa ilang paggawas daling gidakop ang suspek apan ang iyang mga kauban nag-iniyahay og panagan.
Sa kasamtangan, priso karon ang suspek sa San Pedro Police Station ug nakatakdang pasakaan og kaso didto sa korte.