WA mahinayon pagpahalok si Greta sa iyang gwapong crush kay sa layo pa lang nangalisbo na sa kabaho ang baba niini.
Daghang hinungdan nganong manimaho ug siging gadugo ang baba gawas sa daghang bacteria.
Matod sa Read and Digest nga basahon, kini nga mga prutas, gamot ug dahon dunay natural nga sangkap nga maka-pawala sa isog nga baho og seging pagdugo sa lagos.
Una ang Pinya. Kini nga prutas, gawas nga daling mabuhi ug mapalit, dunay digestive enzyme nga gitawag og bromelain nga maoy natural nga molimpyo og mo pawala sa baho sa baba. Mas epektibo kining kan-on o imnon human maka-kaon og sud-an nga halang, daghang sili, ug isog ang baho.
Mansanas. Kining mansanas na ila nga natural nga toothbrush kay inig pang-it nimo ini mo nusnos man kini sa ngipon ug motangtang sa mga nahabiling kiki nga mipilit ug maoy naka ingon sa pagbaho sa baba. Gawas ini, motabang sab kini og pasinaw.
Turmeric- kini nga gamot nga ig-agaw sa luy-a, dunay anti-bacterial ug anti-inflamatory nga sulod nga makapatay sa kagaw ug maka pawala sa bad breath. Makapahiyos sab kini sa mga naghubag ug nag ngol-ngol nga lagos. Ang kanindot kay makatabang sab kini pagpahilis sa kinaon, tambal sa depression ug makapugong sa Alzheimer nga sakit. Aron di kaayo lo-ud, ang usa ka kutsara ini sagulan og init nga gatas sa lubi og tagsa ka kutsara nga cinnamon ug honey.
Mint, sama sa Peppermint. Kung duna kay tanom ini bisag kinaang, dako na og matabang pag-alibyo sa baho nga baba. Usapon ra deritso ang lab-as nga dahon, mo humot na dayon ang gininhawa og baba.
Baking Soda. Ang usa ka kutsara ini isagol sa usa ka tasang tubig nga maoy gamiton sa paglimog-mog kay garantisadong makapawala sa baho.
Ang pag-inum sab og daghang tubig makatabang kay ang na-ugang laway og kanunay nga tak-om nga baba mao may hinungdan sa kabaho.
Kung kini tanan imo ng nasuwayan unya wa gihapoy alibyo, pakigkita gilayon sa mananambal aron masuta ang hinungdan ug mapangitaan og solusyon.