DUHA ka mga lalaki ang gisikop sa kapulisan human sila nasiplatan nga nagdala og 'sumpak' sa alas 4:00 sa kaadlawon kagahapon didto sa dalang Quirino, siyudad sa Davao.
Gisikop mao sila Brendon Alaco, 19, ulitawo ug Garry Abellera, 19, construction worker, pulos nagpuyo sa Purok 8, Seawall, Barangay 76-A Bucana.
Sila Alaco ug Abellera giposasan sa mga sakop sa Mobile Patrol Group nga gipangulohan ni PO1 Esteban dayon gidala sa San Pedro Police Station.
Giingon nga nakigkita ang duha ka mga suspetsado sa ilang nga higalang babaye sa maong lugar apan nasiplatan sila sa mga pulis mao nga gisikop sila.
Samtang didto sa presinto, ang duha nangatarungan nga dili ila ang sumpak nga nakuha sa mga pulis apan ang mga otoridad nagbutyag nga gikan sa mga suspetsado ang nahisgutang armas.
Kagahapon sa buntag giandam na sa kapulisan ang kasong paglapas Comelec gun ban ug illegal possession of firearms aron ipasaka ngadto sa City Prosecution Office.
Ang kapulisan nagpahimangno karon sa mga batan-on nga dili magdala og mga armas sama sa sumpak ug toy guns sanglit apil kini nga gidili sa gun ban nga gipatuman sa Commission in Election.
Tungod sa gun ban, ang tanang kapulisan lakip ang Task Force Davao nagmuntar og mga check point sa mga hilit nga lugar aron susihon ang mga motorista nga mosulod ug moguwa sa siyudad sa Davao. (AD)