2 ka mga pulis ‘nanalaw’, gidis-armahan

TULO ka opisyal sa Police Regional Office 7 ug duha ka police non-commissioned officer nga nagranggo pa og Police Officer 1 ang gipasakaan og kaso sa PRO 7 human sila nisibat atol sa One Time, Big Time operation sa Negros Oriental niadtong Disyembre 27-30 batok sa loose firearms.

Duha sa lima nasuta nga wa mokuyog sa operasyon nga gilusad sa 1,000 kapin ka mga pulis sa PRO 7 sa kabukiran sa Guihulngan.

Samtang ang tulo nanguli nga wa mananghid sa ilang kadagkuan.

Matod ni PRO 7 Director Chief Supt. Debold Sinas nga sa dihang nagbuto-buto na, na-missing ang duha ka mga mag-agaw nga pulis nga taga Dalaguete nga sila si PO1 Melvin Cañete ug PO1 Thomas Cañete, mga sakop sa Regional Mobile Force Battalion 7.

Tungod sa hitabo, naalarma si Sinas sa pagtuo nga aduna siyay sakop nga nakalas hinungdan nga iya kining gipapangita sa tanang pulis nga gidala sa Negros.

Nianang pagka gabii sa Disyembre 27, nipatim-aw Melvin ug Thomas ug nipahibawo nga nasaag sila sa dihang nag buto-buto na.

Didto sila napunta sa usa ka sapa sa bukirang barangay sa syudad sa Guihulngan.

Apan sa imbestigasyon nasuta nga wa sila mokuyog sa bukid sa kahadlok nga ilang gibati.

Nagpabilin sila sa usa ka restaurant nagpaabot nga makabalik ang tanang tropa sa PNP.

“During the operations sa dihang nag buto-buto na, nahadlok sila, nanagan. Pagkatapos nanagan, naa ra sila sa Poblacion, wala na magpakita. So ang tibuok RMFB-7 nato nangita sa ilaha hangtod pagka gabii. Grabe nako ka high blood nganong nagka casualty mi. Only to find out during our technical support, nag-ring ilang cellular phone, naa ra sila sa Poblacion,” matod ni Sinas.

Tungod sa hitabo, gipaimbargohan dayon ni Sinas sa ilang armas ang duha ug gipabalik sa barracks.

Iya kining gipasakaaan og mga kasong cowardice ug dishonesty nga mahimong ikatangtang nila sa serbisyo.

Samtang gipaubos na usab sa imbestigasyon ang tulo ka opisyal nganong nanguli sila sa Sugbo nga wa mananghid kaniya.

Ang tulo ka opisyal wa lang una nganli ni Sinas samtang gipaabot pa ang ilang pagpasabot.

Apan sugod niadtong Enero 1 mipasupot nag kamandoan si Sinas pagparelibo kanila sa ilang unit ug gibalhin sa Regional Personnel Holding Accounting Unit sa PRO7 samtang magpadayon ang imbestigasyon.

Ang duha ka police inspector nadestino kaniadto sa Regional Mobile Force Battalion samtang ang chief inspector na-assign sa Cebu City Police Office. AYB