GIPAHIMANGNOAN sa taga kapitolyo probinsyal ang sunod-sunod nga mga mudos sa giingong kaatbang ni Misamis Oriental Governor Yevgeny Vincente Emano sama na lamang sa daw pagpanghaylo sa katawhan sa Misamis Oriental aron lamang kini madaot.
Nahisgotan niadtong adlaw’ng Martes sa programa sa radyo nga Lambo Misamis Oriental ang sunod-sunod nga reklamo sa pipila ka Misamisnon nga gihimong pagpanghaylo gamit ang pangalan sa gobernador.
Unang insidente daw adunay mga tao nga kalit moadto sa kabarangayan ug magpaila nga taga MisOr Cares, mopasalig dayon nga mang apod ug mga tambal ug ipahulat ang katawhan apan dili na mobalik. Modus niini aron madaot si Emano nga kunohay nagpasalig apan wala gituman.
Warning sa duha ka mga empleyado sa kapitolyo nga dili diretsong mohatag ang MisOr Cares ug tambal kon walay resita sa mga doctor ug walay saktong proseso.
Laing insidente na usab kining giingong pagpanawag sa usa ka sakop ni Gov Bambi sa usa ka kan-anan didto sa Gingoog nga magpareserba og space ug balor P5, 525.00 nga pagkaon kay moabot ug adunay meeting ang gobernador.
Apan daw niabot na ang oras sa gisabotan nga meeting walay niabot hinungdan nakaluto na kini og pagkaon ang maong kan-anan.
Dihang walay miabot gipang-apod apod na lamang kini sa tag-iya sa iyang mga trabahante dihang nakumpirma nga dili kini sugo sa gobernador.
“Atong pahimangno kana bitaw inyong kinaiya ug mga taras ug hiyas nga pag apil sa pulitika nga hugaw...ayaw mo og himo ani nga istilo nga makadaot sa panginabuhian sa usa ka tao. Tungod sa political ambition ninyo, kon ingon ana inyong buhaton mark my word... the more ang mga tao dili mosalig ninyo. Wala man tay lain mapasanginlan ani alangan taga Siquijor,” matud ni Yrat.
Nanawagan kini ug nangayo og depensa sa mga binuhatan sa kinsa man nga walay paglantaw sa mga tao nga ilang nahaylo aron moguba lamang sa pangalan sa usa ka indibidwal.