MOABOT sa 26 ka mga balay ang naugdaw sa mga sunog sa dakbayan sa Sugbo ug Naga kaganiha, Enero 5.
Usa usab ka spa ang naugdaw sa sunog sa dakbayan sa Lapu-Lapu.
Alas 6:11 kagabii sa Sabado, Enero 5, dihang nadawat ang alarma sa kabomberohan sa sunog sa C. Padilla, Barangay Duljo Fatima, dakbayan sa Sugbo.
Giisa kini sa 3rd alarm human ang 10 minutos ug nakontrolar alas 6:57 sa gabii.
Base sa pakisusi sa Cebu City Fire Station nga nagsugod ang sunog sa balay ni Benjamin Lopez ug padayon pa nga gisusi ang hinungdan niini.
Moabot sa 14 ka balay ang naugdaw, P500,000 ang danyos.
Samtang naugdaw ang laing 12 ka mga balay sa sunog sa Sitio Mohon, Barangay Langtad, dakbayan sa Naga.
Ang alarma nadawat sa kabomberohan alas 3:22 sa hapon diin giisa kini sa second alarm sa alas 3:42, matod ni Naga Fire Marshal Sr. Insp. Carmelino Dionela.
Hingpit nga nakontrolar ang sunog alas 4 sa hapon.
Matod ni Dionela nga kasagaran sa naugdaw nga balay ginama sa light materials.
Gibana-bana nga anaa sa P300,000 ang danyos sa sunog.
Base sa pasiunang pakisusi, nagsugod ang sunog sa panimalay ni Marcelina Zamora.
Base sa pamahayag ni Zamora sa kabomberohan nga nagsugod ang kayo sa usa sa mga electical sockets nila sa ilang balay nga giingon nga nag short circuit.
Wa ra hinuoy naangol sa maong sunog.
Spa
Nasunog ang usa ka spa nga giingong iya sa usa ka Korean national nga nahimutang sa Brgy Maribago, Dakbayan sa Lapu-Lapu Sabado sa kaadlawon, Enero 5.
Ang naugdaw mao ang Goong’s Spa nga giingong gipanag-iya sa Harry Byun Inc.
Matod ni SFO2 Primitivo Equito sa Lapu-Lapu City Fire Department nga nadawat nila ang alarma sa sunog alas 2:15 sa kaadlawon nga dali usab nilang girespondehan. HBL, GCM, JKV