MINNEAPOLIS - KAABTIK, kakusog ug power punches maoy makapalukapa nga kumo ni pinoy boxing superstar WBA 147-lb champion Manny “Pac-Man” Pacquiao kang American challenger Adrien “The Problem” Broner.
Kini ang pangagpas ni former WBC Flyweight world Champion Kobe, Hyogo, Japan based via Barangay Cambaro, Mandaue City Cebu Malcolm “Eagle Eye” Tuñacao dihang na interview sa Superbalita Cebu via chat online.
“Kining iyang kombinasyon ni Senador Manny (Pacquiao) nga dili nimo makita apil na iyang left hook nga kalit kaayo ug mao ni makaigo ni Broner 8-round ra ni taman di na kabarog” matod ni Tuñacao ang former amateur RP Boxing Team member gold medalist.
Gidugang ni Tuñacao nga ang unique (iya-iya) style nga atake ni Broner mao ra ang gisaligan sa Cincinnati, Ohio boxer apan di kini makasarang sa kusog sa fighting Senator.
“Wala nako niduwa, igo nalang ko nag part-time trainer karon sa mga batan-ong Japanese boxers diri apan ang regular work nako mao ang pagka Garbage Collector” palabtik sa walhon nga kanhi sakop sa duha ka inila nga ALA ug RWS Boxing Gym Cebu nga si Tuñacao.
Si Tuñacao wala malimot pagpasalamat sa dakung tabang kaniya kaniadto nila ni former world champion “Fearless” Gerry Peñalosa, Promoter Antonio Lopez Aldeguer ug Promoter Rex Wakee Salud nga nahimo siyang world Title holder, tungod nila.
“Sa mga boxing fans sa Cebu ug tibuok kalibutan kumusta kaninyong tanan, maski wala nako nagduwa sa boxing apan pasalamat gyud ko ninyo tanan, Happy New Year kaninyong tanan kay sa hinapon pa: Akemashite omedeto gozaimasu” birada ni Tuñacao.
Si Tuñacao usa lang sa tulo ka mga sikat ug promising fighters kaniadto nga gitawag nila nga “Golden Boys of Cebu Boxing” diin naglakip nila ni former OPBF Welterweight King Rev “Gentle Giant” Santillan ug former OPBF Lightweight Champion Randy “Kumong Bato” Suico nga misulod sa pagka professional boxer sa dekada 90.
“Ang nagtawag nako nga Eagle Eye si sir ALA kay sa amateur pa ko abtik daw kaayo ko’g mata atol sa away, 9 anyos pa ko diha nagpuyo sa ilaha ug gipa eskwela ko” panapos ni Tuñacao.
Sa wala masayod si Malcolm igsuon ni former IBO Minimumweight world Champion Noel “The Eel” Tuñacao.
Ang ilang amahan Jose Flores Tuñacao kanhi truck driver samtang ang ilang inahan Ponciana Alindajao Tuñacao manindahay’g puso humay sa Cambaro, Mandaue.
Ang Pacquiao-Broner Championship ipahigayon karong Enero 19, 2019 Sabado (Domingo RP Time) sa Gambling Capital of the World Las Vegas, Nevada, USA pinaagi sa TGB, Mayweather, MP ug About Billions Promotions nga isalida sa Showtime Pay Per View. (Daniel Quindao Guden, US Correspondent)