ANG Davao Light and Power Company (DLPC) uban sa partnership sa Aboitiz Foundation subling nagpahigayon sa tinuig nga Elektrisyan ng Bayan Award alang sa pag-ila ug paghatag og pasidungog sa mga electricians sa dako nila nga kontribusyon sa komunidad diha sa ilang trabaho.
Ang mga Davao Light executives ug team leaders ingon man ang nagkadaiyang electrician associations anaa sa maong programa nga gipahigayon sa Grand Menseng Hotel, Davao City, Disyembre 18, 2018.
Gihatagan og awards ang mga electricians gikan sa mga nagkadaiyang electrician associations kinsa adunay maayong perpormans sa tuig 2018 dungan sa tumong nga mapalambo pa ang ilang relasyon uban sa Davao Light isip ilang partner sa field.
Karong tuiga, ang nakaangkon isip 2018 Best Electrician award mao si Ramonito P. Mijares sa Panabo Skilled Electricians Association (PUSEA).
Si Mark A. Valencia, ang Davao Light vice president for Engineering, nagbutyag nga dunay dakong papel ang mga electricians sa ilang paghatag og dekalidad nga serbisyo ug sa paghimo nga luwas ang katawhan diha sa ilang mga koneksyon sa kuryente.
“Davao Light's Elektrisyan ng Bayan award is a way to express our appreciation and gratitude towards the electricians for showing high quality performance to the customers and for being a trusted partner of the company. This will also encourage other electricians to provide the level of service required of them," ingon ni Valencia.
Mokabat og 332 nga aktibo nga accredited electricians ang nagtigi karong tuiga alang sa maong pasidungog, apan si Mijares ang milabaw atol sa pagpili gumikan sa iyang “all new electricity connection applications approved with no non-compliance recorded in 2018.”
Gawas niini, upat sab ka mga electricians ang nakadawat og award alang sa ilang di matupngan nga serbisyo.
Ang mga nahisgutan mao sila Dickie L. Anas sa United Electricians of Metro Davao (UEMD), Wennie T. Santander sa Davao Private Electricians Association (DAPREA), Raul C. Cajegas sa DAPREA, ug Marlon B. Ortiz, nga taga PUSEA sab.
Ang ubang awardees nga nakadawat og consolation prize mao sila Jemmy L. Maniquiz, Henry A. Esmores, ug Alex F. Montilla, kinsa mga miyembro sa UEMD; Jose A. Valdez Jr. sa Integrated Electricians Association of Davao (IEAD), ug si Normito U. Tuquib sa Davao Electrical Practitioners Association (DEPA).
Ang mga awardees nakadawat og cash rewards ug mga bag-ong set sa electrical tools.
Samtang ang electricians gikan sa DAPREA, UEMD, ug IEADA gipasidunggan ug nakadawat sab og Certificate of Appreciation alang sa ilang assistance nga gihatag atol sa Gawad Kalinga House Wiring ug sa Typhoon Vinta.
Magpadayon ang Davao Light sa pagpakusog sa ilang serbisyo ug mohatag og mga libreng pagbansay ngadto sa ilang mga partner electricians aron makab-ot pa ang "best quality service" ngadto sa mga kustomer.