COTABATO CITY -- Usa ka test mission ang pagpamomba sa South Seas Mall sa Cotabato City sa mga terorista, sumala sa report.
Kini ang apil sa mga motibo nga gisundan sa otoridad nga nag-imbestigar sa madugo nga pagpamomba.
Usa ka alyas Kagi Imbran nga nagpangedaron og 45 hangtud 55-anyos uban niini si alyas Kifar nga nagpangedaron 17 hangtud 22-anyos nga gitumbok nga maoy nagbilin og duha ka bomba sa South Seas Mall.
Ang mga suspek gitumbok nga mga miyembro sa Dawlah Islamiyah nga nakig-alayon sa pundok ni Shiek Esmail Abdulmalik alyas Kumander Abu Toraife sa BIFF-ISIS Inspired Group.
Moabot sa 20 ka bag-ong local bomb expert ang gibansay sa paghimo og Improvised Explosive Device (IED) ug sa pagpabusikad niini.
Nagbansay ang mga terorista sulod sa Liguasan Delta ug bag-ohay lamang migradwar diin ang pagpabusikad sa bomba apil sa ilang test mission.
Nanimalos sab ang grupo ni Shiek Esmail Abdulmalik sa kamatayon sa duha nila ka kauban og duha ka langyaw nga terorista nga napatay sa gilusad nga High Level Operation sa militar sa Barangay Tatak Mamasapano, Maguindanao.
Giplastar na sa Joint Task Force Central sa militar ang subling pagpahigayon og Law Enforcement Operation batok sa mga terorista nga nagtago-tago sa mga hilit nga dapit sa Central Mindanao.