PATAY na nga miabot sa Southern Philippines Medical Center (SPMC), Dominggo sa buntag, Enero 6, ang suspek sa paglugos ug pagpatay sa usa ka 6-anyos nga batang babaye didto sa Jasa 2, Barangay Sasa, Davao City.
Ang nagpakamatay nga suspek giila nga si Limar Suan Cano, 20-anyos, tireman, nagrenta og boarding house sa Jasa 2, ug residente sa Island Garden City of Samal (Igacos).
Nasayran nga nagpahigayon og pagpanglimpyo sa selda ang mga pulis diin temporaryong gibutang ang mga priso sa pikas kuwarto apan nakurat sila dihang anaa nagbitay sud sa kasilyas ang suspek nga si Cano gamit ang pisi nga gihigot sa iyang liog.
Niadtong Disyembre 28, 2018 nagpahinabi sa mga tigbalita ang suspek ug iyang gilimod ang pasangil, apan subay sa mga ebidensya positibo nga si Cano ang mihimo sa paglugos ug pagpatay sa 6-anyos.
Usa ka video sa pag-interview sa suspek diin nag-viral kini sa social media ug ang sagad nga comments sa netizens, mamatay lang gihapon kini nga kun di mosukol kay nangilog og pusil, maghikog kini.
Apan namahayag ang suspek nga di gyod siya mangilog og pusil aron di siya mapatay, sama sa nahitabo nga duha ka mga insidente sa Talomo Police Station ug usa sa San Pedro Police Station nga susama gihapong nakahimo og linuog nga krimen.
Sa susamang istasyon sa Sasa Police Station giingong naghikog sab ang usa ka amahan nga misunog sa iyang 3-anyos nga anak didto sa Purok 26, Malagamot, Barangay Panacan, Davao City niadtong Abril 17, 2018.
Dead on arrival sab sa SPMC ang amahan nga si Randy Nueva Cadiente.
Bisan unsa pa ang nadangatan sa mga nangamatay nga dunay linuog nga krimeng gihimo, mas misaludo hinuon ang netizens ngadto sa otoridad luyo sa giingong misukol sila ug naghikog ang mga suspek.
Apan suma sa Davao City Police Office (DCPO) mamatay gyod ang si bisan kinsa man nga kriminal ilabina kung mabutang na sa alanganin ang kinabuhi sa polis.
Sa kaso sa duha ka mga piniriso sa Sasa Police Station nga susamang giingong naghikog, mabutang gihapon kini sa pagkuwestiyon sa mga nahibiling pamilya ngadto sa otoridad.