TALENT sa usa ka local tv station sa syudad sa Sugbo ang nadakpan sa buy bust operation sa mga sakop sa City Drug Enforcement Unit sa Cebu City Police Office alas 4 sa hapon sa Sabado, Enero 5.
Ang buy-bust gipahigayon sa parking lot sa usa ka kan-anan sa South Road Properties sa Barangay Mambaling, Cebu City.
Ang nasikop giila nga si Jimbo Cabusas, taga barangay Dumlog, syudad sa Talisay.
Nakuha gikan ni Cabusas ang lima ka dagkong putos sa gituohang shabu lakip na ang usa ka.45 nga pistola ug mga bala.
Matod sa kapulisan sa Cebu City, sinaligan ni anhing Jeffrey “Jaguar” Diaz si Cabusas, gani siya ang gipabantay sa pagtukod sa white house sa Duljo Fatima sa dihang buhi pa si Jaguar.
Si Cabusas nakuhaan og ID sa Cebu Catholic Television Network ug iyang giangkon nga usa siya ka drama talent sa CCTN.
Apan ang CCTN management miklaro nga di na regular nga empleyado sa CCTN-47 si Cabusas ug wa pud moisyu ang CCTN niya og media ID.
Ang management nalipay nga nadakpan siya kay di moantos o mo-tolerate ang management og mga illegal labaw na sa drugs, matod nila ni CCTN chief executive officer Nonito Lim Chua ug station manager Dennes Tabar.
Ang CCTN management dunay surprise drug test sa mga empleyado sa panigurado nga “drug-free” ang kompanya, matod nila. (AYB)