3 patay sa sunog sa Lapu

NAPAIG sa sunog sa may Joanna Legacy Homes sa Sitio Sudtonggan, Brgy. Basak, dakbayan sa Lapu-Lapu ang tulo ka mga magparyenti alas 5:40 sa kaadlawon sa Enero 6.

Sila si Rosalinda Armilla, 55; pag-umangkon niining si Desiree Jalipot, 14; ug apo niining si Aaleyah Jeanne Inoc, 7, na-trap sa ikaduhang andana sa ilang panimay.

Sila ra usab matod pang tulo ang naatol nga natulog sa ilang panimay niadtong tungora.

Gibutyag ni FO3 Oiretuele Baguio sa Lapu-Lapu City Fire District nga base ilang pakisusi, sa unang andana sa panimay nila ni Armilla giingong nagsugod ang kayo.

Dali usab nga mikatap ang sunog sa ubang bahin sa panimay.

Sa pangagpas sa mga kabomberohan, posible nga uwahi nakamatikod ang tulo nga nasunog na ang ilang panimay kay sila nahinanok, hinungdan nga wala na sila makagawas pa sa ilang panimay dihang midako na ang kayo.

Posible usab nga natuok sa aso sila si Armilla dihang nakamata, hinungdan nga wala na sila makagawas sa ilang panimay agi sa bintana sa ikaduhang andana.

Posible usab naglibog sila asa moagi pagawas sanglit ang ubang bintana sa ilang panimay adunay mga grill o ali nga puthaw gumikan sa negosyo niining internetan.

Dihang nakit-an sa kabomberohan ang ilang mga lawas, nag-uban si Armilla ug ang apo niining si Inoc samtang nabuwag sa duha ang pag-umangkon niining si Jalipot.

Dako ang pagtuo sa kabomberohan nga nag-iyahay og salbar sa ilang kaugalingon ang tulo apan naglibog lang og asa moagi pagawas sa ilang panimay gumikan usab siguro sa kabaga sa aso ug kayo.

Gumikan sa hitabo giawhag karon ni Baguio, kinsa usa usab ka fire safety inspector sa Lapu-Lapu City Fire District, ang katawhan nga kung mahimo likayan ang pagbutang og grill sa mga bintana sa ilang mga panimay alang sa kaluwasan panahon sa emerhensiya.

Matod ni Baguio, wa man tuod malatid sa fire code sa Bureau of Fire Protection BFP ang pagdili sa pagbutang ug grill sa mga bintana sa mga panimay apan hugot kini nila nga gi-discourage.

Kung dili malikayan nga dili mabutangan og grill gumikan usab sa panagana batok sa mga kawatan siguroong ang unang andana ra ang butangan og grill.

“Statement ni (ang nahitabo) nga kinahanglan na gayud nga dili na gayud mag-grill kay mag-away ang safety ug ang security,” matod ni Baguio.

“Dili man mi moingon nga ang safety maoy unahon pero ang security side pud dili pud pwede moingon nga silay mag-una. That will always go hand in hand unta,” matod ni Baguio.

Sa mosunod mga adlaw gikatakdang makigtigom ang kadagkuan sa Lapu-Lapu City Fire District sa mga nanimuyo sa mga subdivision sa dakbayan aron mapahimangnoan pa sila sa mga safety tips aron sa ingon malikayan nga adunay susamang insidenteng motumaw.

Gawas sa panimay sa mga biktima nakan-an usab ang tupad nga panimay niini apan dili ra grabe ang danyos.

Sa kinatibuk-an gibana-banang moabot sa P300,000 ang danyos sa sunog nga gipaubos sa 1st alarm ug nakontrolar sud lang sa 30 minutos. (GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph