KASADO na ang preparasyon sa gikatakdang Traslacion o kapistahan sa Itom nga Nazareno sa dakbayan sa Cagayan de Oro.
Gibutyag ni Reverend Father Julius Clavero, ang kura paruko sa Jesus Nazareno Shrine, nga sa Enero 8 adunay ika- siyam nga novena nga misa sa alas 8 sa gabii.
Pagka alas 9:30 sa gabii ibalhin ang imahe sa itom nga Nazareno didto sa St. Augustine Cathedral Church ug adunay prayer vigil sa alas 10 sa gabii paingon sa alas kwatro sa kadlawon usa sugdan ang Santos nga misa.
Alas 5:30 sa buntag magsugod ang Traslacion o prosesyon nga magsugod sa Fernandez Street, pawala sa Velez St, patoo sa Shell Station pabalik sa simbahan sa Nazareno. Adunay mga confetti nga ihulog sa tulo ka hugna gikan sa Cathedral, ikaduha sa New Daw Hotel, ug ikatulo sa overpass sa CM Recto.
Ang Santos nga misa sugdan sa alas 6 sa buntag, sunod alas 7:30 sa buntag, alas 10 sa buntag nga mao ang concelebrated mass. Pagkahapon nga skedyul magsugod sa alas 12 sa udto, alas 2, ug alas 4 sa hapon.
Adunay alas 6 ug alas 7:30 sa gabii ug katapusan nga skedyul mao ang alas 8:30 sa gabii.
Kung mamatikdan nga wala na miabot sa Julio Pacana padulong sa Gaabucayan ug Agora ang prosisyon.
Gipasabot ni Police Superintendent Robert Delos Reyes, hepe sa operations and plans branch, nga bisan unsa nga rota andam silang mohatag og proteksyon sa mga deboto.
Matud ni Engr. Nonito Oclarit sa Roads and Traffic Administration nga wala na giabot sa area sa Julio Pacana ug Gaabucayan tungod sa padayon nga konstruksyon sa dalan nga posibleng maghatag og kahasol sa mga deboto.
Gani ilang gihangyo ang Kagay-anon nga mag give way sa mga katawhan nga nagikan pa sa layong dapit aron motambong sa selebrasyon. (SVB)