PORMAL na nga sugdan ang mga programa ug kalihokan sa ika-unom ka tuig nga Kuyamis Festival dinhi sa Misamis Oriental karong Lunes, Enero 7.
Gikahinamanan kini sa mga Misamisnon hilabina ubay-ubay ka mga kalihokan gipreparar sa kagamhanan nga probinsyal matag sulod sa bag-ong tuig.
Mismong si Misamis Oriental Governor Yevgeny Vincente Emano, kauban si Board Member Prexy Elipe ang nangulo sa pagbukas sa Kuyamis Festival 2019 ug molangtod kini sa Enero 13, 2019.
Ang Provincial Tourism Department, sa pagpangulo ni Atty. Jeffrey Saclot, maoy gitahasan sa tanan nga mga kalihokan aron puno sa kasadya ang selebrasyon duyog ang mga dinapit nga bisita, langyaw man o local nga mga personalidad.
Usa sa highlights sa programa kining mga cultural presentations matag gabii gikan sa 23 ka lungsod ug duha ka dakbayan ang ipahigayon; adunay booth competition, booth display competition, Farmers’ Market, Dance showdowns, indigenous peoples’ skills competition, cultural music concerts, culture and arts exhibits, horse show.
Apan ang labing gikahinaman mao ang Search for Miss Kuyamis 2019 nga gi-representahan sa 20 ka maanyag, malantip og salabotan, ug talented nga mga kandidata.
Gi-aghat ni Emano ang tanan sa pagsaksi sa masadyahon ug mabulokong kalihukan.
Ang Kuyamis Festival gimugna mismo ni Emano sa unang tuig niini nga pagpungko sa kapitolyo ug labihan ang paningkamot nga mapaila ug madala ang Misamis Oriental ug tanan niining hiyas ngadto dili lamang sa tibuok Pilipinas, apan sa tibuok kalibutan.
Sugod sa tuig 2013, ang ihap sa mga turista milubo ngadto sa 50 milyones rason sa pagdaghan sa oportunidad sa trabaho, negosyo, ug kapangitaan sa tanan.
Ang paningkamot nga mapalambo ang turismo niini usa sa dako nga kontribusyon nganong mikunhod ang ihap sa kapobrehon sa lalawigan gikan 1 porsiyento sa tuig 2017, padulong sa 9 porsiyento sa tuig 2018.
“Kining talagsaong pagkunhod sa poverty incidence, nagpasabot nga sa dul-an 900,000 nga populasyon sa Misamis Oriental, duna na’y 9,000 ka tawo ug pamilya nga makakaon na katulo sa usa ka adlaw ug kaya nang maghatud sa ilang mga anak ngadto sa kolehiyo,” matud ni Emano.
Gidugang sab niini nga dili kini mahitabo kon dili sab tungod sa paningkamot sa pangagamhanang lokal, Provincial Board, mga ulo sa departamento sa kapitolyo, mga empleyado, kapulisan, kasundalohan, nasudnong kagamhanan ug ahensiya, ug labaw sa tanan ang katawhan tungod sa ilang walay hunong nga pagpakabana sa kahimtang sa lalawigan. (SVB)