Human trafficking suspek nasikop sa Cordova

Human trafficking suspek nasikop sa Cordova

GIBILANGGO sa detention cell sa Cordova Police Station ang giingong usa sa mga banggiitang nagpaluyo sa cyber pornography ug human trafficking sa lungsod nga dugay na gipangita sa balaod.

Ang dinakpan, kinsang ngan gipugngan una tungod hangyo sa kapulisan, usa ka ginang nga nagpanuigon og 54-anyos.

Ang suspek lumolupyo ra usab sa lungsod ug giingong dugay na nga nagtago-tago human malutsi og warrant of arrest nga giisyu ni Judge Alan Francisco Garciano sa Regional Trial Court (RTC) Branch 28 sa dakbayan sa Mandaue.

Ang ginang gipasakaan og 19 ka counts sa kasong kalapasan sa Republic Act (RA) 9208 kun Anti-Trafficking in Persons Act ug RA 7610 kun Anti Child Abuse Law.

Matod ni Police Inspector Samuel Negro, hepe sa Cordova Police Station, nga ang dinakpan sakop kaniadto sa usa ka grupo nga nalambigit sa ilegal nga kalihukan batok sa mga bata sa lungsod sukad pa niadtong 2009.

Sa inisyal nga nasayran ni Negro sa iyang pagsukit sukit sa ginang, usa lang siya ka runner sa grupo kaniadto.

Siya ang tigkuha sa kwarta sa matag transaksyon nga mabuhat sa grupo ngadto sa mga bata nilang nabiktima.

Lumad nga taga Cordova ang ginang, apan giingong naminyo og taga isla sa Camotes.

Ang ginang niuli sa lungsod niadtong Disyembre hinungdan nga nasikop.

“Dugay na ang warrant diri. Actually mao nay atong nataymingan didto nga naa siyay warrant maong ato ning nakuha siya. Atong pang December 6 pa ni siya,” matod ni Negro.

Wa na

Sa pagkakaron, gibutyag ni Negro, base sa ilang monitoring wa nay nagpaluyo sa human trafficking ug cyberpornography sa ilang lungsod human sa grupo sa 54-anyos nga dinakpan.

Dugang ni Negro nga magsilbi untang leksyon ang pagkasikop sa 54-anyos nga dinakpan gumikan kay nagpakita kini nga di mahimong kalimtan lang sa kapulisan ang mga tawo nga pinangita sa balaod bisan sa dugayng panahon.

“Sa karon, wala na, pero sa karon naa tay gi-monitor mao nang paaboton lang nato nang higayona nga basin maabot sad sila. Ato lang unya nang kuanon, di lang ta kasaad anus-a,” pagbutyag ni Negro.

Nanghimakak

Ang ginang hugtanong mihimakak sa pasangil batok kaniya ug mibutyag nga wa siyay kasayuran nganong nalutsan siya og warrant of arrest.

Dako ang iyang pagduda nga siya ang giduot sa iyang kanhi mga silingan kaniadto nga maoy tinuod nga nakakwarta sa illegal nga kalihukan sa cyberpornography ug human trafficking gumikan kay pulos na nangadatu sa pagkakaron.

Wa siyay kasayuran asa na ang iyang gipangtumbok nga mga silingan kaniadto apan dako ang iyang pagduda nga tua na kini manimuyo sa Mindanao ug hagbay ra nga wa na dinhi sa Sugbo.

Iya usab gihimakak nga nagtago-tago siya human giingong malutsi og warrant of arrest sanglit anaa ra siya kanunay sa ilang balay, gawas niadtong nilarga siya kadali sa lalawigan sa Bohol gumikan sa kamatayon sa iyang inahan. GCM

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph