NAHUMAN na sa Department of Public Works and Highways (DPWH) ang labing taas nga diversion road sa Ormoc City.
Ang maong diversion road nagagikan sa Barangay San Pablo padung sa Barangay Bantigue ning dakbayan.
Duna kini sukod nga 11.145 kilometros ug dunay tulo ka tulay.
Matod ni DPWH 4th LED Engr. Lino Gonzales, duna kini kantidad nga P547 milyones.
Ang maong proyekto gihimo aron maminusan ang problema sa trapiko sa dakbayan.
Dugang ni Gonzales, ang mga motorista nga gikan sa north sama sa gikan sa Tacloban nga mo biyahe paingon sa south sama sa Maasin, mamahimo na moagi niini.
Dili na kinahanglan moagi pa ang mga motorista sa city proper busa gilantaw ang dakong pagkunhod sa problema sa trapiko.
“The completion of this project will be significant for residents, motorists, and commuters to access easy, fast convenient towards destination which in return, improves the economic condition in the area,” matod ni Gonzales.
Pipila ka mga motorista ang nag-ingon nga posibleng daghang negosyo ang itukod sa maong diversion road gumikan kay daghan na ang mag agian niini.
Nadugay paghuman ang maong diversion road gumikan kay dunay ubang residente nga nagmagahi gumikan sa road right of way.
Apan nahusay ra hinuon kini matod sa DPWH.