MINNEAPOLIS-- Swerte nalang kung makalahos sa 5th round si three-division world champion ug challenger Adrien Broner atol panagbagat nila ni 8-division ug World Boxing Organization (WBO) Welterweight champion Manny Pacquiao.
Kini ang pintok nga puntong giluwatan ni former WBO International Featherweight champion ug karon Philippine Army Corporal Rey “Boom Boom” Bautista nga nahinabi sa Superbalita Cebu via chat online.
“Pacquiao daug ni 4th round ra, makatilaw na si Broner sa bug-at nga kumo ni fighting Senator Pacquiao tulog na,” saysay ni Bautista ang sakop sa ALA ug Golden Boy Promotions kaniadto.
Giklaro ni Bautista nga abtik ug mas batan-on si Broner apan dili siya kombinsido sa mga kontra niini, matod ni Bautista nga mas ganahan pa siya sa boxer nga gipildi ni Pacquiao TKO7 nga si Lucas Matthysse.
“Ang dag-anan lang ni Broner kung moabot sa 8th round, pero maglisod gihapon kay dili siya tested nga boxer, may pagka (Floyd) Mayweather ni iya style pero mas kusog si Floyd niya,” palabtik ni Bautista nga lumad taga lungsod sa Candijay, Bohol.
Si Bautista, kanhi mag-uuma sa basakan sa ilang lugar, labing init ug gisunod sa mga boxing aficionados sa Cebu, Bohol, ug tibuok Pilipinas dihang gihurot pagpildi ang tanang kontra atol sa sayong bahin sa iyang boxing career.
Nagsugod sa professional boxing sa tuig 2003 dihang nadiskubre ang iyang talent ni kanhi Amateur Boxing Alliances of the Philippines- Central Visayas President ug Chairman Boxing Development for Bohol Nemi Monton.
Nakaaway si Bautista kaniadto sa undercard sa Pacquiao vs Erik Morales ug undercard sa Oscar Dela Hoya vs Floyd Mayweather Jr., apan nalusno ang tanan dihang ni challenge siya pildi TKO1 batok ni former WBO Superbantamweight King Mexican Daniel Ponce De Leon niadtong Agosto 11, 2007 sa Arco Arena sa Sacramento, California.
Niretiro si Bautista tuig 2014, misulod sa Philippine Army gikan sa Private na promoted sa Private First Class karon Corporal. Siya karon ang boxing coach sa Philippine Military Academy (PMA) cadets ug Physical Education instructor sa PMA.
Nagbase na karon si Bautista sa Baguio City, ang naila nga Summer Capital of the Philippines, naminyo ni Basak Pardo native Maria Cheryl “Che Che” Licayan Bautista, usa ka nars. Aduna silay 5-anyos nga anak na si Rey Gabriel.
Si Boom Boom anak sa magtiayong Berto ug Susan Deligos Bautista, adunay lima ka magsuon si Rey diin gipalitan niya ang iyang pamilya og basakan, duha ka balay, jeepney pasaheroan, tulo ka tricycle nga kita niya kaniadto sa boxing.
Giangkon ni Bautista nga nakahuman siya sa elementary sa Candijay, high school sa University of the Visayas (UV) apan gumikan sa boksing wala siya makasulod sa 3rd year Bachelor of Science in Criminology sa UV.
“Pasalamat ko sa Ginoo, sa akong parents gitudloan ko nila dili magbisyo ug dili mangawat, pasalamat ko sir Ala gi-treat ko niya sama sa anak, sakit iyang kasaba apan makakat-on ka og mga leksyon gikan niya, kang Manny Pacquiao idol tika sir, mikopya ko sa imo style sa Wild Card Gym apan dili makopya imong estelo gyud,” panapos ni Bautista.
Ang Pacquiao-Broner Championship ipahigayon karong Sabado, Enero 19 (Domingo RP Time) sa Gambling Capital of World Las Vegas, Nevada, USA pinaagi sa TGB, Mayweather, MP ug About Billions Promotions nga isalida sa Showtime Pay Per View.