Todino: Plastik pa more

MAAYO og timailhan kining pagsud nato sa bag-ong tuig tungod niining hingpit nga pagdili sa plastic bag nga maoy gamiton pagputos sa mga tindahan ug merkado.

Apan, sa unang duha ka adlaw, dunay 89 dayon ka mga malapason nakit-an sa awtoridad. Sagad niining mga "gahi og ulo" mga vendor raba sa merkado.

Mas maayo nga walay warning ihatag nato sa mga malapason sa balaod aron motagam. Unsa may kalainan sa mga kawatan o snatcher, kon madakpan pasayloan diay? Pastilan!

Dili gyud lisod tumanon ang balaod kay duna may laing paagi nga gitanyag ang gobiyerno. Sa tinuod ang moangal ani mao ang mga manufacturer og plastic kay mawad-an sila og kita.

Pero, kining mga vendor, gagmay o dagko, makapalit man sila og bulsita aron iputos sa ilang paninda. Kon ako lang pabut-on dili nato i-require ang mga vendor nga mohatag gyud og putos. Batasanon unta nato nga magdala ta og kaugalingon eco-bag kon mangumpra.

Ang dakong hagit niini karon mao ang implementasiyon. Hinaut ta nga sobsob gyud ang kampaniya sa gobiyerno hangtod maedukar pag-ayo kining mga tawo. Sugdan nato mismo diha sa eskwelahan Ipasantop sa mga tinun-an ang daotang resulta niining mga plastic.

Nuntan pud unta kining pag-ban sa plastic ang kampaniya batok sa magpataka og labay og basura.

Matag buntag makita nato kon unsa kahugaw atong dalan. Naanad naman gud ang kadaghanan nga magpataka og labay bisan putos sa candy.

Kon disiplinado lang gyud bitaw ang katawhan, makadaginot baya ang gobiyerno kay dili na man mo-hire og tigsilhig sa karsada.

Ang importanti gyud niining pag-ban sa plastic ug kining pagpasagad og labay sa basura mao ang implemenstasiyon.

Mas maayo nga motukod og task force ang City Hall diin tahason ra gyud sa pag-implementar sa maong balaod. Estriktohon gyud nato ba. Kon di makamulta, priso o community service.

Kon sampolan bitaw nato, unya nuntan gyud sa way puas nga kampaniya, mobaniog na sa tibuok siyudad og probinsiya. Ang mga "badlongon" mahadlok na dayon na molapas sa balaod.

Apan, kon maglugaklugak atong awtoridad paglihok, dili gyud ta makapaabot og himsog ug limpiyo nga palibot.

Karon, pa lang makipag-coordinate unta ang City Hall sa tanang non-profit ug civic group sa siyudad aron makatabang sila sa kampaniya.

Himuon nato nga agresibo ang information campaign pinaagi sa pagbutang og mga poster o banner sa bisan asang suok sa siyudad aron dili makapangulipas ang mga tawo nga wa sila masayod sa maong balaod.

Mag-apod-apod ta og mga flyers o brochure kabahin sa maong balaod. Siyaro magpabuta-bungol pa gyud ang mga vendors ug ang publiko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph