GIPAPAHUWAY man tuod sa host Toronto Raptors si Kawhi Leonard apan nibalik ang usa sa ilang mga pambato nga si Kyle Lowry ug nagpadayon ang kainit sa overall leader sa NBA kagahapon.
Si Lowry, kinsa sulod sa unom ka mga duwa wala nakapakita og aksyon tungod sa angol sa iyang likod, nihipos og 12 puntos ug walo ka assists aron tabangan ang Raptors sa pagmakmak sa Indiana Pacers, 121-105.
“He’s a big piece of what we’re tying to do here. It seemed like he hasn’t missed a beat,” matod ni Norman Powell, kinsa maoy nangulo sa kadaugan pinaagi sa iyang 23 puntos.
Si Serge Ibaka nidugang og 18 puntos alang sa Raptors, ningtampo og 15 puntos si Danny Green samtang ningtampo sab og 12 puntos matag usa sila si Pascal Siakam ug Fred VanVleet.
Ang Raptors nakapahugot sa ilang paggunit sa overall leadership bitbit ang 30-12 nga rekord samtang ang Pacers natagak sa 26-13 nga baraha.
Ang Pacers nasugamak sa ika-11 nilang sunodsunod nga kapildihan sulod sa balwarte sa Raptors. Katapusan silang nakadaog ning maong edipisyo niadto pang 2013.
“They were the aggressors all night long,” matod ni Pacers coach Nate McMillan. “We never really established that we could stop them.”
Ang Pacers gipangulohan ni Bojan Bogdanovic pinaagi sa iyang 21 puntos samtang ning-amot og 16 puntos matag usa sila si Domantas Sabonis ug Victor Oladipo.
Sa laing giatangang duwa, nasugamak sa dakong kapildihan ang kuwangan og magduduwa nga mao ang Los Angeles Lakers batok sa host Minnesota Timberwolves, 108-86.
Ang Lakers padayong ningkombati nga wala ang ilang labing sinaligan nga si LeBron James, kinsa nagpaalim pa sa iyang angol.
Sa lain pang mga duwa, ningdaog ang Brooklyn Nets batok Chicago Bulls, 117-100; LA Clippers batok Orlando Magic, 106-96; Atlanta Hawks batok Miami Heat, 106-82; Washington Wizards batok Oklahoma City Thunder, 116-98; ug Charlotte Hornets batok Phoenix Suns, 119-113. AP, ESL