MOKABAT sa 16 ka mga lungsod sa probinsya sa Misamis Oriental ang misalmot sa booth competition dungan sa pagbukas sa Kuyamis Festival 2019.
Sa interbyu kang Governor Yevgeny Vincente Emano atol sa pagbukas niini niadtong adlawng Lunes, Enero 7, nga 16 ka mga booth ang nipartisipar ug nagtukod sa ilang mga nindot nga booth nga adunay tema sa Kuyamis masaksihan karon sa hawanan sa Kapitolyo.
Ang mga misalmot nga lungsod gilangkuban sa lungsod sa Binuangan, Balingon, El Salvador City, Gitagum, Initao, Jasaan, Lagonglong, Laguindingan, Lugait, Manticao, Naawan, Medina, Sugbongcogon, Talisayan, Tagoloan ug Villanueva.
Tagsa-tagsa ka mga booth adunay mga produkto nga gipakita ug gibaligya nga produkto gikan sa kuyamis kon tam-is nga lubi.
Matud sa gobernador nga misaka sa P200, 000.00 ang grand prize sa booth competition tungod kay iyang nakita nga dili tiaw ang gasto sa mga kalungsoran.
“From 100K we gonna double it to 200k kay naghangyo ang mga lungsod dako ilang gasto,” matud ni Emano.
Ang mga hurado niini nga kompetisyon giapilan sab nila ni General Manager of Luxe Hotel Jerome Dela Fuente; President of CdeO Chamber of Commerce Ms. Irene Floro ug Malaybalay City Tourism Officer Ms. Honolo Marie Cruzin.
Basihan sa mga judges ang aesthetic value kon diin sutaon ang agricultural motif, creativeness lakip ang attractiveness.
Ikaduha niini ang exhibit display sama sa physical arrangement kon aduna bay coco products ug gidaghanon sa gidisplay sama sa freshness sab niini lakip ang innovativeness, advertisement ug mga taglines sama sa slogan ang lantawon sa judges.
Sunod ang availability sa impormasyon kon ang ilang mga produkto ug uban pa sulod sa booth. Lakip sa lantawon ang actual promotion kon aduna bay istilo giunsa nila pagbuhat ang booth ug lakip ang kalimpyo sa booth.