TNT vs. Ginebra sa PBA opening

MAGKRUS ang dalan sa Brgy. Ginebra Gin Kings ug Brgy. Ginebra KaTropa sa nag-inusarang duwa sa pagsugod sa 44th season Philippine Basketball Association (PBA) Philippine Cup sa Philippine Arena sa Bocaue, Bulacan karong Dominggo, Enero 13.

Human sa kontrobersyal nilang pagbuhi kang Terrence Romeo, ang KaTropa naglantaw og bag-ong kaugmaon sa pagpangulo gihapon sa ilang lider nga si Jayson Castro.

Adunay hugonhugon nga si Castro nagsilbeng utok sa grupo sa mga magduduwa nga nagsuwat og petisyon aron mapalagpot si Romeo sa KaTropa ug mabalhin sa San Miguel Beermen.

Hinuon, dali ra’ng gipadaplin sa KaTropa kining maong isyu ug nagtutok na lang sila sa ilang kampanya hilabi na kay adunay kausaban sa ilang puwersa.

Lakip sa bag-ong mga magduduwa sa KaTropa mao sila si Michael Miranda, Brian Heruela ug David Semerad.

Ang KaTropa gilaumang makasugat dayon og malisod nga tahas batok sa Gin Kings, nga magsalig lang gihapon og maayo nila ni LA Tenorio, Scottie Thompson, Greg Slaughter ug Japeth Aguilar.

Sa dili pa ang kombati sa KaTropa ug Gin Kings, ipahigayon una ang tradisyunal nga parada sa teams nga pagasundan sa The Leo Awards diin pasidunggan ang top performers sa miaging season.

Sa Leo Awards, gilaumang mokulit og kasaysayan ang Sugbuanong higante nga si San Miguel Beermen center June Mar Fajardo.

Ang produkto sa University of Cebu (UC) Webmasters gilaumang molangkat sa iyang ikalimang sunodsunod nga MVP award. ESL