NABUNYAGAN og 1-0 nga kapildihan ang Philippine Azkals batok sa mas inilog nga South Korea niadtong Lunes sa gabii sa AFC Asian Cup sa Al-Maktoum Stadium sa Dubai.
Ang goal ni Whang Ui-Jo sa ika-67 ka mga minutos maoy nag-agak sa South Korea ning maong kadaugan.
Sa kinatibuk-ang pinatiray, ang Azkals kanunay na lang nagdepensa apan nalutsan kini sa South Korea dihang napasahan ni Hwang Hee-Chan si Hwang Ui-Jo sulod sa box ug libre niining napasulod ang bugtong goal sa duwa.
Ang beteranong striker sa Azkals nga si Phil Younghusband misulod isip substitute sa ika-89 minutos apan wala ra gihapon kini nagsilbe.
Hinuon, kon buot hunahunaon, impresibo ang gipakita sa Azkals gumikan kay wala nakadominar sa duwa ang Koreans, nga maoy runner-up sa miaging edisyon sa kompetisyon niadtong 2015.
Sa sunod nilang tahas, ang Azkals makigharong sa China karong Biyernes una niini sagubangon ang ilang katapusans tahas sa group stage batok sa Kyrgyzstan karong Enero 16.