TULO ka mga kompaniya ang nipakita sa ilang interest pagsalmot sa umaabot nga bidding sa 21 ka garbage compactor truck nga paliton sa kagamhanan dakbayan sa Sugbo.
Si Ronald Malacora, pangulo sa Department of General Services (DGS), niila sa tulo ka mga kompaniya nga gilangkuban sa Hino Motors, RDAK Transport Equipment Inc., ug Hyundai.
Ang mao nga mga kompaniya maoy mag-ilog sa P232.5 milyones nga kantidad sa garbage hauler.
Si Malacora, tsirman sa BAC, nagkanayon nga ipahigayon ang bidding proper karong Enero 22, alas 9 sa buntag sa Cebu City Hall.
“Dunay gipasar nga purchase request ang Department of Public Services diri para pagpamalit og garbage compactor truck kay plano nila wagtangon na ang pagpangabang sa compactor at the same time ang hauling,” pasabot ni Malacora.
Sa 21 ka mga garbage compactor truck, 12 niini ang 6-wheeler 8 cubic meter nga adunay minimum gross weight nga 10,400 kilograms nga nagkantidad og P120 milyones ang kinatibuk-an .
Ang siyam ka garbage compactor trucks mas dako sanglit bisan kon 6-wheeler gihapon, aduna kini gidak-on nga 12-cubic meter nga adunay 16,000 kilograms nga gross weight nga mobalor ang tanan og P112,500,000.
Si Malacora niingon nga ang 12 ka mga compactor truck maoy gamiton sa DPS para sa mga interior roads nga gagmay ang mga karsada samtang ang siyam nga dagko og kaha, maoy gamiton sa mga national highway.
Ang siyam sab ka garbage compactor trucks modiretso og hatod sa basura ngadto unya sa landfill nga maoy makadaog sa ipahigayon nga bidding sa City Government sa mosunod nga mga buwan.
Apan iyang gipahibawo nga di gihapon wagtangon ang transfer station sa Barangay Inayawan sanglit adunay mga garbage truck hilabi na kadtong mga gagmay nga di makalahutay pagdala sa basura paingon sa landfill.
Ang labayanan sa basura nga makaapil sa bidding mao kadtong adunay environmental compliance certificate gikan sa Department of Environment and Natural Resources (DENR) ug makaato sa paghipos sa basura gikan sa Cebu City nga karon gibanabana nga moabot og 700 tonelada matag adlaw.
Dugang sa pangulo sa DGS, ilang gipaningkamotan nga mapahigayon ang bidding proper sa di pa mahuman ang Enero.
Ang pre-bidding ipahigayon karong alas 9 sa buntag.
Gipanginuha sa DGS nga ma-deliver ang 21 ka garbage compactor trucks sa di pa ang Hunyo diin mapupos ang kontrata sa Geo Transport ug Jomara nga maoy hauler sa Siyudad.
Sukad sa pag-asumir ni Mayor Tomas Osmeña, ang City Government nihipos sa basura ug nilabay sa landfill pinaagi sa pagpangabang og heavy equipment.
Sa 2018, ang Siyudad nigasto og labing minos P400 milyones.
Kon naa na ang mao nga garbage trucks, mokunhod na kini, matod ni Malacora.
“Lutong Macau?"
Gihulagway ni Konsehal Raymond Garcia, sa Barug PDP-Laban, nga sigurado na nga ang kompaniya sa iyang kauban sa konseho ang makadaog.
Iyang gipasabot mao si Kapitan Franklyn Ong sa barangay Kasambagan kinsa maoy ABC president ug ex-officio member sa Konseho.
Nipasangil si Garcia nga usa ray tag-iya sa tulo ka mga kompaniya nga mao si Ong.
“Tan-aw nako ila nang gi-corner ang kontrata nga sila na gyud ang modaog ug ila gihapon nang grupo kay kahibawo naman ang tawo nga ang tag-iya anang kompaniya nga ni-bid puro mana kang Franklyn Ong, public knowledge naman na tanan,” padayag ni Garcia bahin sa tulo ka mga kompaniya nga niapil sa pre-bidding conference kagahapon.
Si Ong gisuwayan og tawag sa Superbalita Cebu para makuhaan sa iyang pamahayag, apan way nitubag sa iyang cellphone.
Si Garcia Garcia niingon nga posibleng adunay kalapasan nga mahimo si Ong kon mapamatud-an nga siya ang tag-iya sa kompaniya nga modaog sa bidding proper karong Enero 22 isip kalapasan sa Republic Act (RA) 3019 kun Anti Graft and Corrupt Practices Act.