GIANGKON sa Philippine National Police (PNP) nga gihimo nila ang pag-profile sa mga miyembro sa Alliance of Concerned Teachers (ACT) nga miresulta sa pagkondena sa mga human rights advocates sa nasud.
Kamatuoran niini mao ang pagtaktak ni PNP director General Oscar Albayalde sa tulo ka mga police intelligence officers niadtong Lunes, Enero 7.
Ang pagtaktak kanila di tungod sa gihimo nga profiling sa mga sakop sa ACT, apan ang makalilisang nga paagi sa ilang pagpangalap og impormasyon sa mga magtutudlo.
Kini human migawas ang memorandum sa PNP ngadto sa ilang mga sakop nga maglusad og inventory sa tanang magtutudlo sa publiko ug pribadong tunghaan kinsa sakop sa ACT.
Gitaktak nga intelligence officials gikan sa Santa Cruz, Manila, police station; Batasan, Quezon City, police station; ug lain pang usa sa Zambales province.
Nasuta nga wala naka-unipormeng polis miadto sa mga tunghaan dala ang memorandum pinirmahan ni Police Chief Inspector Rexson Layug, intelligence chief sa Santa Cruz police station sa Manila.
Atong nasayran nga kini gihimo usab sa mga pulis sa uban nga mga probinsya sama sa Bulacan, Sorsogon, Camarines Sur, Agusan del Sur, ug Zamboanga.
Tungod niini, gikondena ni ACT secretary general Raymond Basilio ang gihimo sa kapulisan nga alang nila nakalapas sa ilang tawhanong katungod.
“We have the right to live freely,” tipik sa pahayag ni Basilio.
Katarungan sa kapulisan nga ila kining gihimo human nabulgar ang Red October Movement diin dunay mga estudyante nga gipangrekrut aron palagputon si Pangulong Rodrigo Duterte. Kung ang dapig sa gobyerno ang pasultihon, di dautan ang guhimo sa kapulisan. Apan ang human rights advocates ang pasultihon, nakalapas kini sa katungod sa mga magtutudlo ug naghatag kini og kahadlok sa mga miyembro.
Alang nako, nakalapas gyud ang kapulisan sa konstitusyonal nga katungod sa mga magtutudlo.
Di kini sila mga terorista nga angay panid-an sa kapulisan ug militar ang ilang mga lihok. Ang bugtong butang nga nahimo nila mao lamang ang pagpasakop sa organisasyon nga kritikal sa polisiya sa gobyerno labot edukasyon.
Di nato mabasol ang mga magtutudlo nga mabalaka sa red tagging sa mga progresibong pundok tungod kay duna nay mga kinabuhi nga nakalas kaniadto. Busa, angay molihuk niini ang Department of Education aron di maalaot ang atong pinangga nga mga magtutudlo.