NADAKPAN sa otoridad ang usa ka lalaki nga nangawat og motor nga nakaparada sa usa ka resort sa Dumoy, dakbayan sa Davao, Lunes sa gabii, Enero 7.
Giila ang dinakpan nga usa ka Kent Vale Roda, 21, residente sa Bago Gallera, Talomo District.
Sumala sa imbestigasyon, nakit-an ni Jesus Salgon Castro, guwardiya sa lugar, ang suspek nga gipaandar ug gisakyan dayon gipadagan palayo ang motor nga gipanag-iyahan sa usa ka empleyado sa resort, hinungdan nga iya kining gigukod.
Natsambahan usab nga adunay polis nga nagpatrolya sa lugar, nangayo ug pakitabang ang guwardiya hinungdan nga nasikop ang suspek.
Priso karon ang suspek sa Talomo Police Station ug nakatakdang pasakaan og kaso sa paglapas sa Republic Act 10883 kun Anti-Carnapping law.