GIINGONG naghuramentado ang usa ka lalaki kinsa gidudahang nalisoan sa maayong pangisip ang nanunggab og pasahero sulod sa bus Martes sa buntag sa Carlos P. Garcia Highway, Diversion Road, Buhangin, dakbayan sa Davao.
Giila ang namatay nga usa ka Junie Singson Lucenio, 41, temporaryo nga nagpuyo sa Panacan ug lumad nga taga Ormoc City.
Samtang ang iyang nadunggaban nga gidala sa tambalanan giila nga usa ka Joel Salazar, 33, nagpuyo sa Buhangin.
Sa pakighinabi kang Chief Inspector Peter John Muring, station commander sa Buhangin Police Station, nga una pa nahitabo ang insidente, misakay ang suspek kauban sa iyang igsoon sa Panacan ug padulong sila sa Ecoland terminal, samtang ang biktima, misakay sa NHA Buhangin.
Nagtapad og lingkod ang biktima ug ang suspek sa pinakalikod nga bahin sa Golden Valley Bus nga adunay plaka ADP-5232.
Samtang nagdagan ang bus, giingong naglalis ang suspek ug biktima, dayon mikuha ang suspek og kutsilyo ug gidunggab ang biktima sa ulo.
Gitabang ang biktima ug gidala sa tambalanan.
Ang suspek giguyod sa iyang igsuon panaug sa bus, ug pag-abot sa pulis, buot kini nga pahapaon kay posasan apan kalit na lamang nangilog og armas ug buot pa nga dunggabon ang miresponding pulis hinungdan nga napusilan kini ug namatay.
Si Rodel Miñoza, konductor sa bus, nagbutyag nga dako ang posibilidad nga lalis sa lingkuranan sa bus ang hinungdan sa maong insidente.
“Guot man gud ang bus unya, daghan pasahero ato nga higayon,” saysay ni Miñoza.
Sumala sa igsuon sa suspek nga si Winnie, duha ka adlaw'ng wa sa iyang kaugalingon si Junie sukad niabot sila sa Davao City, aron nga manarbaho og construction, hinungdan nga nakadesisyon kini nga papaulion nalang ang igsuon sa Ormoc una paman nahitabo ang insidente.
“Mao ganing gihatud na unta nako siya sa Ecoland Terminal aron pasakyon pa Ormoc,” ingon ni Winnie.
Giingong nasubo na pag-ayo ang suspek nga maoy hinungdan sa alegasyong paghuramentado niini sud sa pasaheroang bus.
Ang patay nga lawas sa biktima anaa na sa lokal nga punerarya ning dakbayan.