MIPAHIMANGNO ang Lapu-Lapu City Health Officer ngadto sa publiko nga likayan una ang pagpangaligo ug pagpanginhas/panagat sa Mactan Channel gumikan sa kabalaka sa mamahimong epekto sa napalgang infectious medical wastes.
Nasuta nga tulo na ka mga pribadong tambalanan nga maoy tinubdan sa maong mga basura nga gilangkuban sa Chong Hua Hospital Mandaue Cancer Center, Dr. Ignacio M. Cortes General Hospital ug UCMed nga pulos nahimutang sa dakbayan sa Mandaue.
Si Dr. Agnes Realiza, city health officer, nipahibawo sa publiko nga di layo ang posibilidad nga adunay kontaminasyon sa dagat resulta sa naglutaw-lutaw nga medical wastes nga napadpad sa Mactan Channel.
Giklaro ni Mayor Paz Radaza nga ang dapit sa Mactan Channel di luwas kaligo-an sanglit usa man ka navigational area sukwahi sa habig sa Hilutungan channel diin naglumbay ang dagkong resorts ug beaches.
Samtang si Engr. Roderico Tagaan, hepe sa City Environment and Natural Resources (CENRO), nitug-an nga gibana-bana nga motimbang na sa 50 kilos ang basura nga ilang nakolekta sukad niadtong Enero 5.
Labing uwahi kagahapon sa buntag, Enero 9, adunay nakuha sa may Shipyard sa Barangay Poblacion.
Upat na ka barangays ang nakuhaan sa mao nga mga basura nga gilangkuban sa Ibo, Pusok, Pajo ug Poblacion.
Matod pa ni Tagaan nga duha ngadto sa tulo na ka semana ang gidugayon sa medical wastes base sa kabaho niini.
Nakurat sa HIV
Nakaparukat sa mga sanitary inspector sa dihang ilang gitagsa-tagsa og hiling ang sulod nga nakuha nga yellow plastic bags kay adunay mga blood bag nga adunay marka nga HIV, gawas sa gamay nga garapa sa sputum (plema).
Kalapasan sa R.A. 9275 (Clean Water Act) ug R.A. 6969 kun Act to Control Toxic Substances and Hazardous and Nuclear WastesSTES) ang atubangon sa hingtungdan mga tambalanan.
Samtang sutaon pa sa City Legal office ang kantidad sa danyos nga ipahamtang batok sa maong mga establisemento.