KUN adunay plano ang mga party organizers sa umaabot nga Sinulog nga mosuway ug hangyo o ba kaha mobalhin sa dakbayan Lapu-Lapu human higpit nga gidili ang mga party sa dakbayan sa Sugbo ug Mandaue, karon pa lang kasayo giawhag sila sa dili na lang pagpadayon niini.
Kini human ang City Government sa Lapu-Lapu mipahibawo nga wala usab silay tugotang party sa dakbayan sa umaabot Sinulog bisan pa man kung layo ra unta ang dakbayan sa kalihukan sa Sinulog Grand Parade.
Matod ni Lapu-Lapu City Mayor Paz Radaza nga ang way kasiguroan nga magpabiling hapsay ug malinawon ang maong mga kalihukan maoy usa sa rason nganong wa gayud silay tugotang mopahigayon ug party sa ilang dakbayan.
Gihimug-atan sa mayor nga gumikan sa kalihukan sa Sinulog Grand Parade ug Fiesta Señor sa simbahan ubay-ubay gayud sa kapulisan sa dakbayan sa Lapu-Lapu ang motabang sa pagbantay sa seguridad sa dakbayan sa Sugbo hinungdan nga dakong isyu gayud unya ang seguridad kun aduna silay tugotang mopahigayon ug party.
Gawas pa niini, busy usab ang mahabiling mga pulis sa dakbayan sa pagbantay unya sa Traslacion habig sa dakbayan diin gikatakdang dawaton sa dakbayan ang imahe sa balaang bata Señor Santo Niño gikan sa dakbayan sa Mandaue sa Enero 19 sa kadlawon.
“Kanang everytime nga naay party, mobutang man gayud ta ug security like the police and all those, ang ato with the so many daghang mga guest ang ato ang pagdistribute nato and some of our police gigamit man didto sa Sinulog sad so I think it would be kuan siguro nga safe lang ang mga tawo sad pud dili lang ingon nga samok kaayo diri,” pagpasabot ni Radaza.
Gibutyag hinuon sa mayor nga adunay nananghid sa iyang buhatan nga planong mopahigayon ug usa ka kalihukan sa Enero 19 sa gabie diin motukar ang nagkadaiyang mga banda sa football field sa Mactan Export Processing Zone kun MEPZ sa Barangay Ibo apan wa pa kini niya giaprobahan.
Pasabot sa mayor nga bisan kun mosugot ang MEPZ sa ilang pagpahigayon sa naasoyng kalihukan, kinahanglan gihapon nga makapresentar ang organizer niini sa ilang security plan ngadto sa City Government aron ila kini nga ma-aprobahan.
Kinahanglan usab nga makombinsir sa organizer sa naasoyng kalihukan ang City Government nga aduna silay igong security personnel nga masiguro ang kaluwasan sa tanang motambong niini.
“Gitagaan na kuno sila ug go signal ug kuno gitugotan sila sa Peza (Philippine Economic Zone Authority). That’s their place pero other areas outside dili gayud,” matod ni Radaza.