17 ka most wanted persons sikop sa Leyte

Palo, Leyte
Palo, Leyte

PALO, Leyte -- Dul-an sa 20 ka most wanted persons, 11 ka ilegal nga mananagat, ug 6 ka drug personalities ang nasikop sa kapulisan sa Eastern Visayas sud sa unom ka adlaw.

Ang kapulisan sa Tacloban City Police Station 2 pinangulohan ni Police Inspector Noel Enrique uban sa Antipolo City Police ang nisikop sa usa ka Lito Daguman, 28, taga Barangay San Jose, Antipolo City.

Si Daguman dunay kasong two counts of murder ug nalutsan og warrant of arrest.

Gidala sa estasyon si Daguman alang dokumentasyon ug gidala na sa Antipolo Police.

Subay niini, ang Leyte Police Provincial Police Office (LPPO) nakasikop og 7 ka most wanted, samtang 3 ang nasikop sa Southern Leyte Police Provincial Office (SLPPO) sa tulo ka operasyon.

Duha naman ka most wanted ang nasikop sa Biliran Police Provincial Office (BPPO) ingon man sa Northern Samar Police Provincial Office (NSPPO).

Usa naman ka most wanted ang nasikop sa Eastern Samar Police Provincial Office (ESPO).

Lakip sa mga kaso nga giatubang sa mga nasikop nga wanted mao ang rape, murder, illegal gambling, acts of lasciviousness, violence against women and children, kalapasan sa Fisheries Code ug uban pa.

Ang SPPO nakasikop og 8 ka mananagat nga nihimo og ilegal nga panagat samtang ang BPPO nakasikop og 1 ug 1 sa Ormoc City Police.

Nasakmit sa operasyon ang upat ka pumpboat nga nagkantidad og P714,500 ug ubang mga gamit sa ilegal nga panagat.

Samtang sa war on drugs, ang Tacloban Police nakadakop og 3 ka drug personalities.

Ang LPPO nakadakop og 2 ka drug personalities ug tag 1 naman ang nasikop sa BPPO ug SLPPO.

Sa maong mga operasyon nasakmit ang 18 ka pakete sa gituhoang shabu, kalibre.38 nga armas, mga bala ug P3,400 nga salapi.

Matod ni Police Regional Office (PRO)-Eastern Visayas Director Dionardo Carlos, tuyo nila nga sunod sunuron pagsikop ang mga most wanted kinsa nagdala og hulga sa seguridad sa lugar.

Gisaad ni Carlos nga daghan pa nga operasyon ang himuon sa kapulisan batok niadtong mga gipangita sa balaud.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph