PAINGON nang molarga sa Amerika si World Boxing Association (WBA) interim featherweight champion Jhack “El Capitan” Tepora aron adto na ipadayon ang iyang pagbansaybansay alang sa umaabot niyang dakong tahas.
Si Tepora, kinsa adunay impresibong 22-0, 17KOs nga rekord, nakatakdang modepensa sa iyang bakus batok kahg Los Mochis, Sinaloa native Hugo Ruiz (38-4, 33KOs) sa karong Enero 19 sa MGM Grand Garden Arena sa Las Vegas.
Ang away nahilakip sa gikaintapang panagsangka nila ni World Boxing Organization (WBO) welterweight king Manny Pacquiao ug African-American Adrien Broner.
Kauban ni Tepora sa pagbiyahe ang iyang asawa nga si Dinah ug iyang mga igsuon ug sa samang higayon trainers nga sila si Jingjing ug Pingping.
Si Pingping nga nahinabi sa Superbalita Cebu via chat online nagkanayon nga ang Team Tepora anaa na sa Manila ning panahuna aron mangandam sa ilang paglarga.
“Duha na ka buwan nga nag-training si Jhack kuyog among maguwang nga head trainer (Jingjing) pero magpadayon mi’g training sa US para pag-reduce sa timbang niya,” matod ni Pingping.
Si Tepora, kinsa lumad nga taga lungsod sa Lilion, Cebu, gikan sa 9th round TKO nga kadaugan batok kang Mexican Edivaldo Ortega niadtong Hulyo 15 sa Kuala Lumpur, Malaysia sa undercard sa Manny Pacquiao-Lucas Matthysse bout.
“Dili lang mi mokompiyansa sa sayo nga round kay beterano si Ruiz busa among plano ari namo sudlon magkataas na nga mga round,” dugang ni Pingping. Daniel Quindao Guden, US Correspondent