NITUMAW karon ang kabalaka sa estado sa kaminyuon sa 17 ka mga magtiayon nga gikasal ni Dumanjug Mayor Efred Guntrano Gica gikan sa buwan sa Agusto hangtod sa Disyembre sa miaging tuig. Balido ba kini o dili? Ang korte ray makadeklarar niini.
Ang Department of Interior and Local Government (DILG) niinstalar ni Vice Mayor Rene Asentista isip mayor sa Dumajug niadtong Enero 2018 sa dihang gipalagpot si Gica pagkamayor sa Office of the Ombudsman tungod sa kasong graft.
Apan gi-reverse sa Court of Appeals (CA) ang dismissal order sa Ombudsman, mao nga nilingkod pagbalik si Gica niadtong Agusto 2018. Tungod kay giapelar ang desisyon sa CA, gipanglikod pagbalik si Asentista sa miaging semana.
Apan ang atong hisgutan mao ang mahitungod sa 17 ka magtiayon nga gikasal ni Gica samtang naglingkod siya sa puwesto. Ang pangutana mao, may gahum ba nga mokasal ang usa ka mayor?
Gihatag ang maong gahum ubos sa Republic Act 7160, ang Local Government Code of the Philippines. Sa mga mayor sa kalungsoran: Sec. 444(xviii) “Solemnize marriages, any provision of law to the contrary notwithstanding.” Sa mga mayor sa syudad: Sec. 455 (xviii) “Solemnize marriage, any provision of law to the contrary notwithstanding.”
Gibutangan og “any provision of law to the contrary nothwithstanding kay gitangtang man ang gahum sa mga mayor sa pagkasal ubos sa Family Code of the Philippines apan gibalik sa Local Government Code.
Ubos sa Family Code, ang makakasal mao da ang mga (1) incumbent nga huwes sulod sa ilang hurisdiskyon; (2) pari, rabbi, imam, o ministro sa usa ka simbahan o relihiyusong pundok nga gitugotan sa pagkasal; (3) kapitan sa barko o eroplano sa mga kaso sa in articulo mortis kon himalatyon na ang usa sa gikasal samtang naglawig ang barko o naglupad ang eroplano ug bisan atol sa mga stopovers; (4) military commander nga dunay gidestino nga chaplain apan wa diha ang chaplain; ug (5) consul-general, consul o vice-consul kon ang gikasal mga Filipino citizens didto sa gawas sa nasod.
Mahitungod sa kabalaka nga nulo ug di balido ang 17 ka magtiayon, aniay tubag ang Family Code of the Philippines.
Ang Art. 35 niini nagkanayon, “The following marriages shall be void from the beginning: (2) Those solemnized by any person not legally authorized to perform marriages unless such marriages were contracted with either or both parties believing in good faith that the solemnizing officer had the legal authority to do so.”
Kon usa sa gikasal o ang duha ba hinuon, ang babaye ug lalake, sa tinarong nagtuo, in good faith, nga ang solemnizing officer adunay legal authority sa pagkasal, balido gihapon ang ilang kaminyuon.
(edbarrita@gmail.com)