NAHIMONG isyu ang hulagway ni Presidential Assistant for the Visayas Michael Dino nga nikatap sa social media diin nakita kining mitabok sa soccer field sa Philippine Institute of Sports Complex didto sa Pasig City gikan nga nanaog sa helicopter.
Ang maong hulagway nga gi-post sa wa matinong tinubdan, adunay caption nga “VIP used the restroom and the chopper took off again.”
Buot siguro ipasabot sa nag-post nga gipatugpa ni Dino ang helicopter sa PISC, kanhi Ultra sa Pasig, aron lang mangihi. Kon tinuod ni, kadakong binuang.
Wa gihimakak ni Dino nga siya kadtong anaa sa hulagway nga na-post. Apan gipasabot sa iyang kampo nga ang katuyoan niadto mao ang pagkuha og laing kauban/staff nga iyang ikakuyog paingon sa Batangas alang sa paglusad sa ika-20 nga Malasakit Center sa nasod.
Sugo sa lawas nga natukma sa kahigayonan, wa usiki ni Dino ang panahon ug midalikyat na lang usab kini sa pag-adto sa bathroom aron mangihi.
So, basi sa saysay ug pagpasabot ni Jonji Gonzales, ang spokesperson sa Presidential Assistant, way gihimong bati o dautan si Dino kay di man ang pagpangihi lang maoy tuyo niini.
Duna lay mga tawo siguro nga nagbaton og dakong kasilag ug kasuko ngadto kaniya ug gipahimuslan ang kahigayonan aron pagguba ug pagdaot sa iyang pangalan.
Kon atong itidlom ug ipunting pailawom ang pagtuki kon unsa gyud ang lingtunganay ug katuyoan niini, dili masalikway nga posibling aduna usab kini bulok sa pulitika.
Wala man tuod si Dino magpapili sa umaabot bugnong lugaynon, apan dayag ang iyang hugot nga pagsuporta og mga pulitiko ilabi na dinhi sa Sugbo.
Tinuod man o dili ang maong alegasyon, apan sa gihapon, milampos ang nag-post niini sa ilang katuyoan. Ug kini mao ang pagdaot o pagbugalbugal sa ngalan ug sa pagkatawo ni Dino.