“UMARI kanako kamong tanan nga gikapuyan ug gibug-atan kay papahulayon ko kamo.”Million ang ihap sa kapulisan sa mga deboto nga miapil sa traslacion sa imahe ni Black Nazarene o Itom nga Nazareno gikan sa Quirino Grandstand ngadto sa simbahan sa Quiapo didto sa kaulohan kagahapon.
Sa dakbayan sa Davao, naa sab laing version sa pagsaulog sa mga deboto nga dili makaadto sama sa uban nga modayo aron lang moapil sa traslacion nga ginahimo matag tuig didto sa kaulohan.
Daghan ang nagatuo nga mahimo silang bulahan ug mapanalanginan kon sila mo-sakripisyo tungod sa ilang pagtuo sa Ginoo.
Dili nato mabasol ang kadaghanan nga misagop sa mao nga pagtuo nga napanunod sa katigulangan, mga relihiyusong katawhan nga midawat sa pagtulon-an nga dala sa mga langyaw gikan sa Espanya, nga kanunay ginahisgutan ni Presidente Rodrigo Duterte nga gidala sa atong nasud ni Ferdinand Magelan, pagtulon-an nga gitudlo sa Katoliko nga simbahan.
Mahimong sukwahi ang pagtulon-an kon atong itandi sa gitudlo ni Hesus diha sa Bibliya apan alang sa Katoliko nga pagtulon-an gihatagan og gahum ang konselyo sa Iglesia paghimo'g interpretasyon kon asa ang tumanon sa mga isyu diin dunay pagsumpaki sa kalabot sa Bibliya ug sa ginatudlo sa simbahan.
Sa mensahe ni Hesus nga nasulat sa basahon ni San Mateo, kapitulo 11 bersikulo 28, siya nagkanayon; “Umari kanako kamong tanan nga gikapuyan ug gibug-atan kay papahulayon ko kamo.”
Buot sa Ginoo nga makapahulay ang iyang mga katawan, dili na kinahanglan magsakit sa ilang kaugalingon ug makapahulay sa mga pag-antus apan mas gipili sa minilyon ang pagsakripisyo, mobaktas sa kadalanan nga magtiniil, modutdot sa bagang duot sa katawhan uban ang risgo sa kinabuhi ug pagtuo nga bisan makagunit lang sa pisi makabaton sila’g kaayohan labi na sa mga dunay balatian.
Alang sa uban, bulahan ang mamatay diha sa prosisyon samtang ang uban naghandom pa kanus-a sila mahimong bulahan ug mapanalanginan.
Sa laing bahin usa ka positibo nga panglantaw kay hilabihang duot sa katawhang Pinoy ang nagahandom nga mahimong buotan ug hugot pa ang pagsalig sa Diyos ug nanghinaut ta nga ang ilang pag-apil alang lang sa pagpangayo'g pasaylo sa ilang nabuhat nga kasal-anan apan human sa pag-apil sa prosisyon mobalik na sab sa ilang naandan nga binuhatan.
Sa katapusang bahin, akong idugang ang imbitasyon ni Hesus nga sumpay sa itaas nga atong gihisgutan diin siya nag-ingon; “Isangon niya kaninyo ang akong yugo ug magtuon kamo kanako, kay ako maaghop ug mapaubsanon sa kasingkasing, ug makakaplag kamo og pahulay sa inyong mga kalag.”