EMOSYONAL si Ruby Orovillo samtang niapil sa penitential Walk with Jesus bitbit ang imahen sa Señor Sto. Niño gikan sa Fuente Osmeña Rotunda paingon sa Basilica Minore del Sto. Niño, siyudad sa Sugbo.
Sa unang higayon, nasaksihan sa 17 anyos nga dalaga nga lumad nga taga Trinidad, Bohol, ang lawom nga debosyon sa mga Sugbuanon sa balaang bata pinaagi sa pagsaulog sa umaabot nga kapistahan niini.
Wa siya magdahom nga makaapil sa Walk with Jesus niadtong Lunes, Enero 10, nga maoy nagbukas sa siyam ka adlaw nga nobenaryo ug mga kalihukan sa ika-454 nga kapistahan ni Señor Sto. Niño karong tuiga.
“Dinhi ko naka-feel nga ingon ani diay ni, nindot kaayo. Lami man gud sa feelings nga makaapil ka ani nga for the first time nimo, makakita ka og mga tawo nga ingon ani ka devoted,” pahayag ni Ruby, tinun-an sa grade 11 sa usa ka kolehiyo sa siyudad sa Sugbo nga nagsul-ob pa sa iyang uniporme sa tunghaan, kuyog sa iyang maguwang nga si Regine nga dinhi na sa Sugbo nagtrabaho.
Nabantayan ni Padre Pacifico “Jun” Nohara Jr., rector sa Basilica ug over-all chairman sa kasaulogan karong tuiga, nga nagkadaghan ang mga deboto karong tuiga, hinungdan nga nihangyo siya niini nga magbawon og pasensiya ug likayan ang away sa pagsimba.
Sa iyang wali sa opening mass sa unang adlaw sa nobenaryo, si Nohara namahayag ang pagmata og sayo sa kabuntagon pinaagi sa pag-apil sa procession kay usa ka sakripisyo nga nagpadayag sa dakong gugma sa mga deboto ngadto sa balaang bata.
Ang rector sa Basilica nidasig sa mga deboto nga nitambong sa misa nga isip mga anak sa Diyos, himuon nga giya ang Señor Sto. Niño diha sa pagkamapaubsanon ug pagpangalagad.
Siya nidasig usab sa mga ginikanan nga giyahan og maayo ang kabataan kay dako kini og papel sa katilingban labi na karong tuiga, gipahinungod alang sa mga batan-on.
Nasugdan usab og sayo ang unang misa, 20 minutos sa gi-eskedyul nga alas 5:30 sa buntag.
Sa misa, giinstalar ang magtiayong Atty. Paulino Yabao ug Dioscora Yabao, isip Hermano ug Hermana Mayor karong tuiga sa kapistahan ni Señor Sto. Niño.
300T miapil
Gibana-bana nga anaa sa mga 300 mil ka nga tawo ang ningsalmot gikan pa sa Guadalupe church hangtod na sa Fuente Circle ug bisan na sa pag-abot sa Basilica del sto. Niño.
Matod ni Police Regional Director Chief Supt. Debold Sinas, kinsa nangunay gyud sa pagdumala sa kahapsay ug kalinaw, nga ang unang kalihukan alang sa kapistahan ni Sr. Sto. Nino nagmalampuson ug nagmalinawon.
Usa sa ilang gitan-aw nga nakatampo nga mas nidaghan ang nisalmot mao ang maayo nga panahon.
Ang gipahimutang nga seguridad sa kapulisan, sud ug gawas sa compound sa Basilica, matod ni Sinas, 24 oras na hangtod na matapos ang kapistahan. SCG, FMD