USA sa mga nagdumala sa Davao City Environmental Care Inc. (DCECI) nihangyo sa publiko nga dili usab sila hukman dayon, kay bisan sila ang natinga kon ngano adunay mga plastic sa mga basura gikan sa tambalanan ang nidagsa sa kabaybayunan sa dakbayan sa Lapu-Lapu.
Ang managing head sa maong kompanya nga nagdumili nga magpahingalan alang sa iyang seguridad, human usab mabasa sa mga social networking site ang mga kalagot sa publiko, nitug-an sa Superbalita Cebu nga sigurado sila nga nagsunod gyud sa kon unsay nalatid diha sa balaud sa Department of Environment and Natural Resources aron di' matangtangan sa ilang permit kon accreditation nga maoy mokuha, mo- transport ug mo-treat sa nga hospital waste.
Ang maong kompanya nga nagsugod sa Davao ug ni-branch out dinhi sa Sugbo sugod niadtong 2016, mao na ang nagkulekta sa hospital waste sa Chong Hua Mandaue City, sa UCMed ug sa laing pribadong tambalanan nga anaa sa dakbayan sa Sugbo.
"Na-shock mi, natingala sad mi ngano na (naay hospital waste sa dagat).. We are certain, that we religiously follow everything stated sa rules and regulations sa DENR.. kay dagko biya pud na og penalty (if violation is made)," saysay sa usa sa mga nagdumala sa DCECI.
Abli usab ang kompanya sa bisan unsa nga inbestigasyon, gani human unang nigawas ang report niadtong Sabado, giingon nga dali nikontak kanila ang Chong Hua ug usa sa representante sa tambalanan ang personal nga nisusi sa pasilidad sa DCECI diha sa barangay Umapad, dakbayan sa Mandaue.
Dugang sa maong tagdumala nga dali usab dayon sila nga nakig-alayon sa hingtungdan nga tambalanan, ug sa Environmental Management Bureau (EMB)-Central Visayas alang sa gihimo nga inbestigasyon.
Ug sa pagkakaron nga nagpadayon pa ang inbestigasyon, nipadayag kini nga paabuton lang una nila ang resulta sa gihimo nga pakisusi, una pormal nga mopagawas sa ilang official statement.
Ang Davao City Environmental Care Inc. ang nag-inusara nga accredited nga outsource company nga mo- dispose sa mga basura sa tamabalanan sa Sugbo.
Hinuon bisan nagpadayon ang inbestigasyon, giangkon usab sa nagdumala sa DCECI nga padayon ang ilang pag-operate ug pagkuha sa mga basura, kada semana, suma sa maoy nalatid sa ilang gisudlan nga kontrata.
Samtang nagplano ang Mandaue City Environment and Natural Resources Office nga personal moduaw sa Lapu-Lapu City Cenro, kon karong adlawa di pa gihapon makapadala sa ilang opisyal nga komunikasyon kalabot sa listahan sa nga tinubdan sa hugaw, ang Cenro Lapu-Lapu City.
Kini aron usab kasugdan ang ilang himuon nga inbestigasyon sa mga tambalanan nga nahimutang sa syudad sa Mandaue nga giingo'ng maoy nanag-iya sa hospital waste.