DUNA’Y bag-ohon ang Roads and Traffic Administration (RTA) sa sunod tuig sa kapistahan sa Itom nga Nazareno labi na sa prosisyon human wala na-perfect ang ilang traffic scheme niadtong Enero 9, 2019.
Duha ka mga sakyanan ang namatikdan nga nagparada sa rota sa prosisyon bisan pa man mga “no parking” sign nga gipamutang sa RTA sa dalan Velez, dakbayan sa Cagayan de Oro.
Sa pakighinabi kang engineer Nonito Oclarit, officer-in charge sa RTA, gibutyag niini nga dunay mga adjustment nga ilang ipatuman sa sunod tuig nga prosisyon.
“Naa mi adjustment nga himuon sunod tuig, naa mi e-apply nga masiguro gyud namo nga walay maka-parking diha,” matud ni Oclarit.
Gidugang pa usab niini nga mag-agad pa usab sila kung susama gihapon ang rota nga ma-uyonan sa kinabag-an aron nga maplanohan og insakto apan giingong kini naman ang ikaduhang tuig human gibalik ang orihinal nga rota sa prosisyon sugod nga ni-abot ang replika sa Itom nga Nazareno dinhi sa siyudad.
“Kaning rota man gud sa prosisyon dili man nga kami ra gyud ang gabuot ani consensus mani siya labi na simbahan sa Nazareno kay mag-agad man gud na kung asa lugar ang rota sa black Nazarene,” dugang niini.