MISAKA na usab ang presyo sa petrolyo. Ang diesel ug kerosene misaka human sa onse ka sunod-sunod nga pagkunhod sa presyo niini samtang human sa tulo ka semana nga sunod-sunod nga pag-us-us sa presyo sa gasolina misaka kini karon og 80 sentabos matag matag litro.
Kining maong pag-umento tungod sa presyo sa lana sa world market sunod sa panagsabut sa Saudi Arabia ug sa Organization of Petroleum Exporting Countries (OPEC) sa posibleng pagminus sa oil production sa ilang mga nasud. Ang Saudi Arabia nagsugod na gani sa pagminus sa ilang oil production. Moduwa na ang supply and demand. Wala pay labut niini ang pag-implementar sa second tranche sa excise tax on fuel ubos sa Tax Reform and Inclusion (TRAIN) law diin patungan og P2 matag litro sa g gasoline ug diesel ug piso sa liquefied petroleum gas (LPG). Way labut niini anaa pay ipatung nga value-added tax nga P2.24 sa diesel ug gasoline samtang P1.12 sa LPG.
Hinaut pang i-angan angan lang usa ang pagpatuman sa second tranche sa excise tax sa TRAIN law aron ma-estudyohan pag-ayo sa gobiyerno kining pagsaka sa presyo sa petrolyo. Mosulbong na usab unya ang presyo sa nanag-unang palaliton. Moping-it na usab ang atong kaigsuonan sa kamahal sa mga palitonon nga makapaminus sa ilang kompiyansa sa Duterte administration sa pagdumala sa ekonomiya sa nasud. Mosunod unya ang nagkalainlaing protesta nga paluyohan sa mga walhon ug sa political opposition.
• • •
Gi-imbestigar sa Presidential Anti-Corruption Commission (PACC) ang tulo ka mga opisyal sa gabinete ni Presidente Duterte. Giila ni PACC Commissioner Manuelito Luna ang giimbestigar nga sila si Labor Secretary Silvestre Bello III, kanhi Customs Commissioner nga karon Technical Education and Skills Development Authority (TESDA) chief Isidro Lapiña ug National Commission on Indigenous People Chairman Leonor Oralde-Quintayo. Apan nasuko si Sec.Bello ug nihulga nga iyang ipatangtang si Commissioner Luna ni Presidente Duterte, Ang iyang katarungan nga gipahibawo kuno dayon ni Luna sa publiko ang iyang ngalan nga wala lang gani siya pahibaw-a nga may kaso siya sa maong commission.
Kining reaksiyon ni Bello dili makaayo kaniya ug sa presidente. Nagpakita kini nga suod siya ni Duterte ug way arang kaniya. Maayo gani kay giuyonan sa Malacañang ang imbestigasyon nga gihimo sa PACC. Kon wala may sala si Bello, di na kinahanglang manghambug siya sa kasuod niya sa presidente, hinunoa iyang tubagon ang maong kaso aron sa paglimpiyo sa iyang ngalan. Ako hinuon mituo sa pasalig sa Malacañang nga way “sacred cow” sa gobiyerno ubos kang Duterte. Gipasalig ni Presidential Spokesman Salvador Panelo nga kon adunay tawo nga makalapas sa balaud bisan unsay iyong posisyon sa gobiyerno, mahigala man, pariyente, o kaaway, kinahanglang manubag sa iyang binuhatan. Gitutokan sa katawhan ang maong kaso. (mannyrabacal1144@gmail.com)