GIBUKSAN kagahapon sa kaadlawon ang ika 454 nga selebrasyon sa Pista Senyor pinaagi sa “Walk with Jesus,” duha ka kilometro nga solemning prosesyon gikan sa Osmena Boulevard paingon sa Basilica Minore del Sto. Nino.
Nagbaha ang mga deboto nga miapil sa prosesyon. Ang entiro nga Osmena Boulevard nahimong usa ka lawod sa dinagkotan nga kandila nga gidala sa mga deboto – babaye ug lalake, batan-ing ug tiguwang.
Sumala pa sa bana-bana sa Cebu City Police Office, mokabat sa 300,000 ka mga tawo ang miapil sa prosesyon. Moingon kita nga bana-bana kay wa man ipha sa tagsatagsa ang miapil sa proseson. Apan giingon nga mas daghan kini kay sa miaging tuig nga gibanabang niabot og 80,000.
• • •
Human sa prosesyon gisugdan ang labing una nga novena mass sa kapistahan sa Senyor ug human niini, si Fr. Pacifico “Jun” Nohara Jr., ang rector of the basilica, nisapnay sa imahen ni Sto. Niño ug nangulo sa mga deboto sa pagsinug.
Ang sinug mao ang pag-ampo sa Senyor. Sayaw nga usa ka lakang sa abante ug duha ka lakang sa atras. Lahi ni sa linaktan sa tawong hubog nga atras abante. Mao gani nga nigawas ang usa ka panultion sa taga Cabadiangan nga ang tawong di mosubay sa tul-id nga dalan hubog.
Apan ang maong sayaw mao ang sinugdan sa Sinulog grand parade, ang labing dakong cultural celebration sa Pilipinas nga gipasiugdahan ni kanhi Cebu Customs Collector David “Boy” Odilao.
• • •
Matag tuig nga tanan magsako ang mga deboto sa Senyor diha sa basilica. Apan di tinuod nga kon ang deboto mosiyagit og Pit Senyor, nisiyagit siya nga nagpatabang kay napiit sa daghan kaayong mga tawo.
Ang Sinulog grand parade gitambongan sab sa minilyon ka mga tawo matag tuig. Karong tuiga, gidili na ang mga street parties. Ako mismo nakasinati nga napiit ko sa daghang mga tawo samtang naglakaw ko sa Mango Avenue (General Maxilom Avenue) pipila ka tuig na ang milabay tungod sa mga street parties.
Magpuasa sab ang mga tawo sa ilang mga cellphone kay idayon ang pagpawong sa mga cellphone signal atol sa Sinulog. Di na maka Facebook. Pero magamit gihapon sa selfie. Unya na i-post human sa Sinulog grand parade.