ANG pag-ambush patay sa usa ka bigtime drug personality sa Argao niadtong miaging adlaw morag karaang script sa kapulisan. Morag old script sa salida sa sine o stage drama apan daghan gihapon ang motan-aw mao nga mokita gihapon. Kana bang estorya nga dugay na kaayong gigamit sa kapulisan apan daghan gihapon ang motuo.
Pareho ra sa estorya nga gipusil ang usa ka suspek kay nangilog og armas sa pulis bisan gipusasan. Binaklid pa gyud. O gipusil sa escort kay mi-aksiyon og eskapo bisan gihapon nakapusas.
Ang biktima nga si Tocelio Ababon, sakay sa usa ka patrol car sa Cebu Provincial Police Office (CPPO) pa-ingon sa Argao aron ikiha human siya madakpi niadtong miaging semana atol sa buy bust operation didto sa Argao. Si Ababon, matod pa, negosyante og lechon apan diay takuban lamang kini. Drugas diay maoy iyang negosyo. Matod pa nga luyo-luyo siya ni self-confessed drug lord Franz Sabalones. Atol sa operasyon nakuhaan siyag P10 milyones nga drugas. So, bigtime gyud.
Sakay sa Police patrol car gikan sa Cebu City mao sila si PO3 Roel Patalingjug nga maoy nag-drive ug si PO3 Crecenciano Alajid isip escort. Pag-abot nila sa Bulasa, Argao adunay tulo ka mga motorsiklo nga mibabag kanila ug dayon mirapido sa sakyanan gamit ang nga short firearms nga kalibre .45 ug 9mm pistol. Base kini sa nakuhang mga kabhang sa crime scene. Human paaraki ang mga sakay sa patrol car, misibat dayon ang mga nagmotor.
Dead on arrival sa hospital si Ababon human maigo sa ulo. Way tatsa o samad ang mga pulis kay matod pa naka-bullet proof vest. Buot ipasabot wala madutli. Apan base sa hulagway, guba ang windshield sa likod sa sakyanan. Nakasul-ob usab kuno og bullet proof vest si Ababon apan na-igo sa ulo hinungdan sa iyang kamatayon. Hingigo pod ang mga responsable no kay gi-ulo si Ababon?
Motuo kaha mo ning maong estorya? Tuo na lang ta kay aron madali. Gawas pa, wala kita sa lugar pagkahitabo. Unya di nato paryente si Ababon. Maka-ingon gani kita nga mirisi kay druglord. Pero katuhuan-dili ang estorya labi pa kay way nasamdam sa mga escort. Nagpasamad-samad pod unta to bisan usa lang kanila aron katuhuan. Nagduda ko nga gi-salvage to. (bobbygnalzaro@gmail.com)