SECTIONS
Monday, March 25, 2019
SUPERBALITA CEBU

Sugilanon: Ang gusto ni Mara

sugilanon

Fredrick F. Gelbolingo

121 Prenza, Argao, Cebu

SA klase ni Ma’m Baling sa sabdyek nga ‘Values Education.’ Sanglit hapit na man ang Valentine’s Day, gituki nila ang bahin sa gugma, gikan sa panag-uyab-uyab ug hangtod na sa pangutana kon unsang klaseha sa tawo ang gustong mabana sa mga estudyanteng babaye sa Girls High School.

Dihay igaton nga mitubag, “Tall, dark and handsome!”

Dihay siawon namulong, “Small but terrible!” Nanghugyaw ang iyang mga klasmeyt kay gilain man nila pagsabot.

Mitindog ang usa ug misulti, “Sweet and loving person!”

Misunod pag-ingon ang iyang seatmate, “Genius and Serious!”

May taasong estudyante didto sa luyo nga miisa sa iyang kamot.

“Juvelyn, unsay imong ikasulti?” ni Ma’m Baling.

“Ako, Ma’m, I want to marry a man who’s truthful ang thoughtful!”

“Okey na. Ikaw, Karlyn, unsay gusto mong mabana?” ni Ma’m Baling.

“Kanang honest and sincere. Ma’m!”

Dihay mitindog sa ‘front row’ ug misulti,”I want a man who is respectful and patient.”

Madasigon kaayo ang ubang mga estudyante nga abtik nga miisa sa ilang mga kamot aron pagtubag sa maong pangutana sa ilang maestra. Apan taliwala ning tanan nakita ni Ma’m Baling ang usa ka estudyante nga nagtungok lang ug daw way kadasig. Naglingkod lang kini nga ang mga kamot giakob pagpahimutang sa armchair. Ang labing brayit nilang klasmeyt kon balihon, si Mara.

“Uy, Mara! Ikaw, unsa may gusto nimong ma-bana?” ni Ma’m Baling.

“Ah. Apilon pa gyud kong Ma’m, uy!” reklamo ni Mara nunot ang hilaw nga katawa kay gitutokan man siya sa iyang mga klasmeyt.

“Kinanghanglan kang mo-participate, Mara, kay klase man ni, aron naa kay grado,” pasabot sa maestra.

“Ang akong gustong ma-bana, Ma’m... kanang di manghatag,” ni Mara nga nangawot sa iyang ulo ug na-seryuso ang nawong.

“Ha?!” nakalitan si Ma’m Baling. Milingi-lingi siya sa mga klasmeyt ni Mara. Dihay pareho niya nga nahibulong. Diha poy mibahikhik sa tago.

Dihay miingon, “Pareha sa iyang papa, hakog.”

“Bad man na, Mara. Values Education baya ning atong subject. Bahin ni sa maayong pamatasan ug kinaiya. Unya, ganahan nuon kag bana nga di manghatag?” ni Ma’m Baling nga nahasinta.

“Si Papa man god...” ni Mara nga nanglugod sa iyang mga mata kay kahilakon.

“Ngano man diay si Papa mo?” sa maestra nga masuk-anon.

“Sige’g pangaway kang Mama! Maong gusto kog bana nga ‘di manghatag’ og problema, aron magmalipayon among pagpuyo, way gubot,” ni Mara nga mihilak.

“Ah, mao diay!” ni Ma’m Baling nga miyango-yango. Misunod pagyango-yango ang iyang mga estudyante. (Katapusan)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!