PISTA ni Senyor Santo Niño ang kasaulogan ug usa lang sa mga kalihukan ang Sinulog.
Di mardi gras ang Sinulog kon di grand parade.Unsay kalainan? Way relihiyosong kabahin ang mardi gras ug pulos ra kini lingawlingaw. Anà!
Mga deboto, magdungan tag singgit: Pit Senyor!
• • •
Sa dihang didto ko sa Quezon City sukad adtong Disyembre 30 hangtud Enero 6, nakurat ko nga ang akong SKYdirect subscription sa Oslob may HBO HD, AXN HD, Warner TV HD, History HD, Blue Ant Entertainment, Metro Channel, CNN ug TLC na man.
Nanghatag diay ang SKYdirect og libreng access sulod sa 12 ka adlaw sa Pasko sa mga makapa-load sulod sa Disyembre. Wow! Thank you!
• • •
Lima ra ka pelikula sa 2018 Metro Manila Film Festival ang akong nakita: One Great Love, Aurora, Fantastica, Rainbow’s Sunset ug Mary, Marry Me.
Salamat sa pases nga gihatag nila ni Ms. Angela Javier-Cruz, Irene Fernando ug Gia San Pedro.
Mas nalingaw ko kay P12 ray akong gibayad imbes P241 kada pelikula.
Wa nako matan-aw ang Jack Em Popoy kay gipangayo sa akong ig-agaw nga si Eric Doños nga dakong fan ni Maine Mendoza ug matod pa ni Eric nga mabaw ra ang istorya niini.
Parehas kini sa Fantastica nga way laing tuyo kon di magpakatawa sa mga nanan-aw.
Wa sad ko kalugar sa The Girl In Orange Dress nga gihulagway ni Eric nga relevant ug relatable ug wa gisalida sa SM Fairview ug Fairview Terraces cinemas ang Otlum.
Nindot gyud tinuod ang Rainbow’s Sunset ug di lang kini mahitungod sa tema nga LGBT kay mas gihatagan niini og gibug-aton ang pamilya nga mounong kon magka-apikihay na.
Mas pabor ko ni Kim Chiu (One Great Love) pagka best actress kay mas daghan siyag acting highlights kay kang Gloria Romero (Rainbow’s Sunset).
Ang gipagarpar nga halok ni Eddie Garcia ug Tony Mabesa kay igo ra mang nagdapat ang ilang mga ngabil sa usa ka segundo.
Di parehas sa mga artista sa batan-on pa ang ilang karakter nga ukobay gyud.
• • •
May mga bag-ong programa ang GMA 7 nga magsugod sa unang tulo ka bulan sa 2019.
Kini mao ang Sahaya nga bidahan nila ni Bianca Umali, Miguel Tanfelix ug Migo Adecer; TODA One I Love nila ni Kylie Padilla, Ruru Madrid, Gladys Reyes, Victor Neri, David Licauco, Jackie Rice, Kim Domingo, Tina Paner, Maureen Larrazabal, Raymond Bagatsing, Cai Cortez, Buboy Villar, Archie Alemania, Kimpoy Feliciano, Ayeesha Cervantes ug Bruce Roeland; ug ang Kara Mia nila ni Barbie Forteza, Mika dela Cruz, Jak Roberto, Paul Salas, Carmina Villarroel, Glydel Mercado, Mike Tan, John Estrada, Alicia Alonzo, Althea Ablan, Liezl Lopez ug Karenina Haniel.