NAPAKGANG ang kainit sa defending champion San Miguel Alab Pilipinas human sila nasugamak sa kapildihan batok sa host Westsports Malaysia Dragons, 72-71, sa niadtong Miyerkules sa gabii sa grabe ka kulbahinam nga duwa sa Asean Basketball League (ABL) sa Maba Stadium sa Kuala Lumpur, Malaysia.
Ang layup ni Jonathan Wong sa nahabiling 18 segundos maoy nakapadaog sa Dragons.
Aduna pa unta’y igong kahigayunan ang Alab Pilipinas nga mailog ang kadaugan apan nakamugna og turnover si Ethan Alvano sa return play.
Ang kapildihan maoy labing unang naangkon sa Alab Pilipinas human nila gisugdan ang torneyo pinaagi sa lima ka sunodsunod nga kadaugan.
Hinuon nagpabilin ang Alab Pilipinas sa ibabawng bahin sa standing.
Ang Dragons, nga ningsaka sa 3-3 nga rekord, kanunay nga nagsikit sa Alab Pilipinas hangtod nga nakakita sila’g saktong kahigayunan aron maposte ang makapakurat nga kadaugan.
Sama sa naandan, ang Alab Pilipinas gipangulohan na sab sa ilang duha ka imports nga sila si Renaldo Balkman ug PJ Ramos.
Nimugna og game-high nga 31 puntos ug 14 rebounds si Balkman samtang niamot og 16 puntos ug 11 rebounds si Ramos.
Apan ning kombatiha, wala’y saktong suporta nga nadawat sila si Balkman ug Ramos gikan sa ilang lokal nga mga kauban.
Puntos matag usa:
Malaysia (72) – Wong 21, Egwu 15, Loh 12, Eversley 12, Tan 6, Chan 3, C. Chin 3
Alab Pilipinas (71) – Balkman 31, Ramos 16, Tiongson 6, Parks 5, Domingo 5, Javelona 3, Rosser 3, Alvano 2, Urbiztondo 2. ESL