MOPADALA og duha ka team ang defending champion nga University of Santo Tomas (UST) sa pagsugod sa 4th Pinay in Action (PIA) Cup football tournament Byernes, Enero 11, sa Tionko field, Barangay 76-A, Matina, dakbayan sa Davao.
Gibutyag kini ni PIA project manager Ayra Malabayabas atol sa Davao Sportswriters Association (DSA) Forum Huwebes, Enero 10, sa The Annex of SM City Davao.
Matud ni Malabayabas, “UST, I think, has been holding their training camp in Davao for the UAAP. They have two teams in the tournament. Last year they only had one team in Dumaguete City.”
Ang PIA Cup, sumala kaniya, gihatud dinhi sa Davao sa pipila ka mga women's football teams nga nia karon dinhi.
Ang liga, gipasiugdahan ni Pinay in Action founder Pia Cayetano, giisponsoran sa Ulticon Builders, Incorporated. Hinuon mga mananaug sa liga di modawat og ganting salapi.
Gisulti sab niya nga 15 ka 9-A-Side teams nagkompirma, apil na ang tim gikan sa Manila, Maco, Compostela Valley, Kidapawan City, Surigao City, Zamboanga City ug Davao City.
Ang mga team tungahon ngadto sa tulo ka grupo ug ang mag-unang duha ka team base sa points system moabante ngadto sa sunod nga hugna aron pagdeterminar sa semifinalists padulong sa tigi sa kampeyonato.
Lakip nga nakasulod mao ang UP Women's Football Team X, UP Women's Football Team Y (Manila), Sky Warriors Football Club sa Maco, Compostela Valley; FC 95 Iligan Ladies sa Iligan; Bellas Chikaz sa Kidapawan, Lianga Football Club without a Pitch sa Lianga, Surigao del Sur; Baliwasan-Red Corals United Football Club sa Zamboanga City; Tiago Football Club sa Dapitan; ug Bad Bonitas sa Dipolog City.
Ang dakbayan sa Davao ipresentar sa Sikat Alab Football Team, CR7-Food Truck, PCT-Medvil Football Club ug University of the Philippines (UP) Mindanao Football Club.