Seguridad sa Sinulog sa Magsaysay pahugtan

MAGSAYSAY, Davao del Sur -- Gihugtan na sa kapulisan ang seguridad alang sa tinuig nga Sinulog dungan sa kapistahan sa parokya ni Señor Santo Niño.

Adunay matag gabiing programa kon cultural night nga gipahigayon sa lungsod.

Gimando ni Senior Inspector Ivan Samoraga, hepe sa kapulisan sa Magsaysay Municipal Police Station, ang hugot nga pagbantay sa iyang mga ginsakpan ug nagpahigayon sab sila og patrolya sa palibot.

Dungan niini, gipahimangnuan sa opisyal ang katawhan nga di mokompiyansa ug di biyaang way tawo ang ilang mga balay aron dili mabiktima sa mga kawatan.

Bisan mga motorista gipa-amping batok sa mga motornapper.

Nagpahigayon sab og checkpoint ang kapulisan sa kadalanan.

Gikatakdang saulogon sa parokya ang ilang kapistahan sa Enero 16 ug maningkamot ang kapulisan nga mahimong hapsay ug malinawon ang palibot ilabi na nga gilauman ang pagdagsa sa mga bisita.