TULO ka mga opisyal sa Davao City Police Office (DCPO) ang temporaryong gihulipan gikan sa ilang posisyon isip mga station commanders tungod sa kakuwang sa Investigation Officers Basic Course (IOBC).
“Requirement po kasi yan, meron pong order from higher headquarter na lahat ng Chief of Police (COP) should graduate of Investigation Officers Basic Course (IOBC),” matud pa ni Jason Baria, Police Regional Office (PRO)-Davao Region spokesperson, sa paghinabi pinaagi sa telepono sa SunStar Davao Huwebes, Enero 10.
Sumala ni Baria nga ang hinungdan nga mopailawom sa IOBC mao ang pag-imbestigar sa wala masulbad o mga naka-ung-ong nga kasong kriminal sa dakbayan kay usa sa ilang gambalay sa puwersa mao ang pag-imbestigar.
Gibutyag niya nga ang IOBC himuon sulod sa 45 ka adlaw nga pagbansay sa tanang opisyal sa polis ug rekisito kini sa posisyon nga COP.
Base sa DCPO bulletin, si Police Chief Inspector Ben Baluan sa San Pedro Police Station gihulipan ni Police Chief Inspector Melvin Violan samtang si Police Chief Inspector Peter Muring sa Buhangin Police Station gipapahulay ug gihulipan ni Police Chief Roy Matteo.
Si Police Chief Inspector Bernie Suaga sa Marilog Police Station gihulipan ni Police Chief Inspector Estrello Ramiso.
Ang gihulipan nga mga opisyal idestino sa DCPO Headquarters hangtud nga ilang matuman ang maong “mandatory requirement” gikan sa taas nilang headquarters.
Si DCPO commander Alexander Tagum nagsulti sa text message nga ang gipanghulipan nga station commanders makabalik sa ilang estasyon human makompleto ang IOBC.